دیوبند میں ’’مرکز آن لائن مدرسہ‘‘کا افتتاح

دہلی: (دعوت نیوز ڈیسک)

مرکز المعارف ایجوکیشن اینڈ ریسرچ سنٹر، ممبئی کے زیر اہتمام دیوبند کے محمود ہال میں "مرکز آن لائن مدرسہ” (MOM) کا باضابطہ افتتاح کیا گیا۔ اس موقع پر ایک دو روزہ قومی سیمینار کا انعقاد بھی کیا گیا جس میں ملک بھر سے دو سو سے زائد علماء اور دانشوروں نے شرکت کی۔ سیمینار میں جدید ٹیکنالوجی کا استعمال کرتے ہوئے مختلف موضوعات پر تبادلہ خیال کیا گیا اور انگریزی میڈیم آن لائن مدرسے کے نصاب کو حتمی شکل دینے پر اتفاق ہوا۔
مرکز المعارف ایجوکیشن اینڈ ریسرچ سینٹر کی بنیاد 1994 میں معروف اسلامی اسکالر مولانا بدرالدین اجمل القاسمی نے رکھی تھی۔ اس ادارے کا مقصد مدارس کے فارغ التحصیل طلبہ کو انگریزی زبان اور ادب کے ساتھ ساتھ جدید کمیونیکیشن ٹیکنالوجی کی معیاری تعلیم فراہم کرنا ہے تاکہ وہ اسلام اور مسلمانوں کے حوالے سے عالمی سطح پر موثر انداز میں خطاب کرسکیں۔ مرکز کے دو سالہ ڈپلومہ ان انگلش لینگویج اینڈ لٹریچر (DELL) کورس نے نمایاں کامیابی حاصل کی ہے۔
اب تیس سال بعد مرکز المعارف کے فارغین نے "مرکز آن لائن مدرسہ” کے ذریعے ایک منفرد تعلیمی منصوبہ متعارف کروایا ہے۔ اس پانچ سالہ کورس کا نصاب روایتی مدرسہ طرز پر ہوگا لیکن تعلیم انگریزی زبان میں دی جائے گی۔
مرکز کے ڈائریکٹر مولانا محمد برہان الدین قاسمی نے بتایا کہ پندرہ سال سے زائد عمر کے ایسے مرد و خواتین جو انگریزی زبان جانتے ہیں لیکن کسی وجہ سے مدرسہ نہیں جا سکے وہ دنیا کے کسی بھی کونے سے اس کورس میں داخلہ لے سکتے ہیں اور گھر بیٹھے ’عالم‘ کورس مکمل کر سکتے ہیں۔ اس کا مقصد جدید ٹیکنالوجی اور براہِ راست تدریسی طریقوں کے ذریعے اسلامی تعلیم کو ہر ممکن حد تک آسان اور قابل رسائی بنانا ہے۔
اس موقع پر دارالعلوم دیوبند کے مہتمم اور شیخ الحدیث مفتی ابوالقاسم نعمانی نے صدارت کی، جبکہ مولانا بدرالدین اجمل القاسمی مہمانِ خصوصی کے طور پر موجود تھے۔ دونوں بزرگوں نے www.markazonlinemadrasa.com کی ویب سائٹ کا باضابطہ آغاز کر کے اس تعلیمی منصوبے کا افتتاح کیا۔
سیمینار میں دارالعلوم دیوبند کے ممتاز علماء جیسے مولانا رحمت اللہ کشمیری، مولانا عبدالخالق مدراسی، مولانا رشید اعظمی، مولانا مظمل علی اسامی، مولانا شوکت علی بستوی، مولانا محمد سلمان بجنوری اور مولانا حسن محمود راجستھانی نے شرکت کی اور مرکز المعارف کی اس انقلابی تعلیمی کاوش کو سراہتے ہوئے اس کے کامیاب مستقبل کے لیے دعا کی۔

***

ہفت روزہ دعوت – شمارہ 01 دسمبر تا 7 دسمبر 2024