نئی دہلی، جنوری 31— متعدد افراد جو جامعہ ملیہ اسلامیہ میں پولیس کی موجودگی میں ایک مسلح نوجوان کی فائرنگ کے خلاف رات سے دہلی پولیس ہیڈ کوارٹر کے باہر احتجاج کر رہے تھے، انھیں جمعہ کی صبح حراست میں لے لیا گیا اور راجیندر پلیس پولیس اسٹیشن لے جایا گیا ہے۔ ذرائع کے مطابق 30 سے زائد مظاہرین، جن میں زیادہ تر طلباہیں، کو حراست میں لیا گیا ہے۔
جمعرات کی سہ پہر جامعہ کے باہر پرامن احتجاج پر ایک مسلح شخص کی فائرنگ کے دوران پولیس کی مبینہ طور پر عدم فعالیت کے خلاف طلبا اور مقامی لوگ دہلی پولیس ہیڈ کوارٹر کے سامنے بیٹھے تھے۔ مظاہرین کا کہنا ہے کہ انھیں حراست میں لینے سے پہلے پولیس نے لاٹھی چارج کیا تھا۔
جمعرات کی سہ پہر کو راج گھاٹ جاتے ہوئے پر امن مظاہرے پر 18 سال میں دو ماہ کم کی عمر کے نوجوان نے فائرنگ کردی۔ یہ واقعہ جامعہ کے مرکزی دروازے کے قریب پیش آیا، جب پولیس خاموش تماشائی بنی رہی۔ بندوق بردار پر بعد میں پولیس نے قابو پا لیا۔ فائرنگ سے ایک طالب علم زخمی ہوگیا جسے اسپتال منتقل کیا گیا۔ پولیس کو تنقید کا سامنا ہے کیونکہ انھوں نے زخمی طالب علم کو اسپتال لے جانے کے لیے بھی رکاوٹیں نہیں ہٹائیں۔ بائیں ہاتھ سے خون بہنے کی وجہ سے زخمی طالب علم کو پولیس کی رکاوٹوں سے چھلانگ لگانی پڑی اور اسے قریبی ہولی فیملی اسپتال میں داخل کرایا گیا۔ بعد میں اسے آل انڈیا انسٹی ٹیوٹ آف میڈیکل سائنس کے ٹروما سینٹر میں منتقل کردیا گیا۔
جامعہ کی وائس چانسلر نجمہ اختر نے رات کے آخر میں ایمس میں طالب علم سے ملاقات کی اور اعلان کیا کہ اس کے تمام اخراجات یونی ورسٹی برداشت کرے گی۔ انھوں نے یہ بھی کہا کہ پولیس کے محض تماشائی بنے رہنے کے واقعے نے پولیس فورس پر ان کا اعتماد ہلادیا۔
اس واقعے کے فورا بعد ہی ہزاروں افراد نے فائرنگ کے خلاف جامعہ کے قریب احتجاج کیا اور پھر فائرنگ اور پولیس کی بے عملی کے خلاف مظاہرہ کرنے کے لیے بڑی تعداد میں پولیس ہیڈ کوارٹر پہنچ گئے۔ ان میں سے درجنوں افراد نے پوری رات احتجاج جاری رکھا جن میں سے 30 کو جمعہ کی صبح حراست میں لیا گیا۔
دریں اثنا پولیس نے اس بندوق بردار کے خلاف قتل کی وارداتوں کی کوشش کا الزام لگایا ہے جس کے فیس بک پروفائل، جسے واقعے کے کچھ گھنٹوں بعد ہی سوشل میڈیا سائٹ نے ہٹا دیا تھا، سے پتہ چلتا ہے کہ وہ ہندوتوا کی سیاست اور نظریہ سے متاثر تھا۔