بی جے پی کی پسماندہ مسلمانوں سے سیاسی قربت

کرسٹاف جیفریلو، کلیارسن اے

مترجم: محمد عبدالمؤمن، بنگلور

معروف مفروضے کے برخلاف مسلم کمیونیٹی میں موجود برادریوں اور ذاتوں کے بیچ اندرونی نابرابری کا فرق کافی کم ہے، بلکہ مجموعی طور پر پوری کمیونیٹی ہی محرومی کا شکار ہے۔
چند ماہ قبل بھوپال میں بی جے پی کے کارکنوں سے خطاب کرتے ہوئے وزیر اعظم نریندر مودی نے اس بات پر زور دیا تھا کہ ان کی پارٹی کے جانب سے غریب مسلمانوں کو فراہم کردہ سیاسی قربت کو اعلی برادری کے مسلمانوں کے ذریعہ غریب و پسماندہ مسلمانوں کے سنگین استحصال اور دیگر سیاسی پارٹیوں کے ووٹ بینک والی سیاست کے بیانیہ سے تقویت ملے گی۔ وزیر اعظم کی اس تقریر اور بی جے پی کے حالیہ دنوں میں پسماندہ مسلمانوں کو اپنانے کے واقعات نے ہندوستانی مسلمانوں میں ذات پات کی بحث کو جلا بخشی ہے۔ درآں حالیکہ ہندوستانی مسلمانوں میں ذات پات کی موجودگی کی نفی نہیں کی جا سکتی، البتہ ان ذاتوں کے مابین سماجی و معاشی نا برابری کی سنگینی ہندو قوم کے بالمقابل برائے نام ہے۔    
ہمارے ملک میں مسلمانوں کی وسیع تر درجہ بندی تین ذاتوں میں کی جاسکتی ہے۔ اشراف، اجلاف اور ارذال، جن کا تقابل بالترتیب اعلی ذاتوں، دیگر پسماندہ طبقات (او بی سی) اور دلتوں سے کیا جا سکتا ہے۔ بحیثیت مجموعی دلت مسلمان خود کو سروے رپورٹوں میں درج فہرست طبقات (ایس سی) کے طور پر متعارف نہیں کراتے ہیں کیونکہ انہیں ایس سی ریزرویشن سے باہر رکھا گیا ہے۔ ان کی ذاتیں عمومی طور پر او بی سی فہرست میں شمار کی جاتی ہیں۔ ہندوستانی مسلمانوں میں او بی سی ساٹھ فی صد، اعلی ذاتیں 38 فی صد اور ایس سی / ایس ٹی دو فی صد پائے جاتے ہیں۔ یہ ساری برادریاں مختلف غیر مرکوز جغرافیائی علاقوں میں آباد ہیں۔ مثال کے طور پر، اتر پردیش اور بہار کے 76 فی صد مسلمان پسماندہ ہیں جن میں او بی سی اور دلت شامل ہیں۔  
ہم نے حالیہ دنوں میں جاری کردہ
All India Debt and Investment Survey
(AIDIS)
(Periodic Labour Force Survey(PLFS
سروے رپورٹس سے حاصل شدہ کثیر جہتی متغیرات (multidimensional variables) جیسے دولت کا تصرف، نوکریوں تک دسترس اور تعلیم کی حصول یابی کو استعمال کرتے ہوئے ہندوستانی مسلمانوں میں واقع سماجی عدم مساوات کا جائزہ لیا اور اس کا موازنہ ہندو آبادی میں موجود سماجی عدم مساوات کی صورتحال سے کیا۔
2019ء میں ہندو اعلی ذاتوں کی فی کس دولت کمانے کی شرح 8,64,984 روپیے تھی جبکہ ہندو اوبی سی میں یہ شرح 4,27,149روپیے اور دلتوں میں 2,28,437 روپیے تھی۔ مسلمانوں میں اعلی ذاتوں کی فی کس دولت کمانے کی شرح 3,43,014 روپیے اور مسلم او بی سی میں 3,10,922 روپیے تھی۔ معلوم یہ ہوا کہ اوسطا ہندو اعلی ذاتوں کی دولت دلتوں سے تین گنا زیادہ تھی جبکہ یہ شرح او بی سی کی دولت سے دوگنی تھی۔ مسلمانوں میں یہ فرق صرف دس فی صدی کا ہے۔ بہار، جہاں پسماندہ مسلمانوں کی ایک بڑی آبادی رہتی ہے، مسلم ذاتوں کے مابین دولت کی نا برابری کا فرق بالکل معمولی ہے یعنی صرف دو فی صدی۔ جبکہ مدھیہ پردیش میں پسماندہ مسلمانوں کی دولت کمانے کی صورتحال اشراف سے 14 فی صد بہتر ہے۔  
اس کے برعکس اتر پردیش میں (جہاں ابھی بھی زمیندار اشرافیہ کے باقیات موجود ہیں) یہ فرق 43 فی صد ہے۔ جبکہ اگر ہم یوپی میں ہندو ذاتوں میں دولت کے فرق کا موازنہ کریں تو معلوم ہوتا ہے کہ ہندو اعلی ذاتیں او بی سی سے دوگنی اور دلتوں سے تین گنی زیادہ دولت کی مالک ہیں۔
یہی رجحان اخراجات کے معاملے میں بھی دیکھا جاسکتا ہے۔ 2021-22کے اعداد و شمار کے مطابق مسلم اعلی ذاتوں میں ماہانہ فی کس اخراجات 2,180 روپیے تھے اور اس کے بالمقابل پسماندہ مسلمانوں میں یہ شرح 2,151 روپیے تھی، یعنی صرف 1.4 اعشاریہ کا معمولی فرق۔ ہندو ذاتوں میں متعلقہ اعداد و شمار قدرے مختلف تھے: 3,321 روپیے کے ساتھ اعلی ذاتیں، او بی سی ( 2,180 روپیے) کے بالمقابل 40 فی صدی اور دلتوں ( 2,122 روپیے) کے مقابلے میں 57 فی صد زیادہ خرچ کر رہی تھیں۔ یوپی کے مسلمانوں میں یہ فرق کافی کم صرف 6.2  فی صد تھا اور بہار میں یہ فرق 10 فی صد کا تھا۔ جبکہ یہ فرق یو پی کی ہندو اعلی ذاتوں اور او بی سی کے درمیان 48 فی صد اور دلتوں کے بیچ 60 فی صد رہا ہے۔ بہار میں یہ فرق  بالترتیب 27 اور 48 فی صد تھا۔  
تعلیم کی حصولیابی کے اعتبار سے بھی اشراف اور پسماندہ برادریوں کے مابین کوئی قابل ذکر فرق نہیں پایا جاتا ہے۔ سال 2021-22 میں اعلی تعلیم حاصل کرنے والے اعلی ذات کے مسلم نوجوان (18-23 سال) کا فی صد 19.8 تھا جو کہ پسماندہ نوجوانوں کے برابر تھا۔ اس کے برعکس ہندو اعلی ذات کے نوجوانوں میں اعلی تعلیم حاصل کرنے کا فی صد 46.5 تھا جبکہ یہ اعداد و شمار او بی سی میں 36 اور دلتوں میں 26 فی صد تھے۔ دلچسپ بات یہ ہے کہ مدھیہ پردیش اور یو پی میں پسماندہ مسلمان اپنے ہم منصباعلی برادریوں سے بہتر حالت میں ہیں۔ درحقیقت یو پی میں مسلمانوں کی اعلی برادریوں کے تعلیمی اندراج میں منفی ترقی دیکھی جارہی ہے۔ نتیجتا 2021-22 میں ان کے اندراج میں 12 فی صد تک گرگئی تھی جو کہ 2011-12 میں 14 فی صد تھی۔ ہمارے علم کے مطابق یہ صورتحال ہندوستانی تاریخ میں اس سے پہلے کبھی نہیں دیکھی گئی کیونکہ اب تک ہر سماجی گروہ کو وقت گزرنے کے ساتھ اعلی تعلیم کے مزید بہتر مواقع حاصل ہوئے ہیں۔    
مسلمانوں کی تعلیم تک کم رسائی کا اثر باقاعدہ نوکریوں کے حصول میں ہو رہا ہے۔ تنخواہ دار ملازمین کی تعداد مسلمانوں میں 19.3 فی صد ہے جبکہ اس کے مقابلے ہندووں میں 21.5 فی صد ہے۔ حالانکہ مسلم اعلی برادریوں اور پسماندہ آبادی میں اس معاملے میں کوئی فرق نہیں پایا جاتا ہے۔ اس کے برعکس ہندو اعلی ذاتوں میں تنخواہ دار ملازمین کی تعداد 33 فی صد ہے، او بی سی میں 19.9 فی صد اور دلتوں میں 21.5  فی صد ہے۔ یو پی، بہار، راجستھان، مہاراشٹر، آندھراپردیش اور کرناٹک جیسی ریاستوں میں پسماندہ مسلمانوں کی حالت اعلی ذاتوں سے بہتر ہے۔ جب کہ ہندو اعلی ذاتیں آج بھی اچھی نوکریوں میں اپنا دبدبہ رکھتی ہیں۔
خلاصہ کلام یہ ہے کہ ہندوؤں کے مقابلے میں مسلمانوں میں ذات اور برادری کے خطوط پر کوئی قابل ذکر امتیاز نہیں پایا جاتا، ہندو ایک انتہائی غیر مساوی کمیونٹی ہیں جن میں صرف ان کی اعلی ذاتیں نفع میں ہیں جبکہ مسلمان اجتماعی محرومی کا شکار ہیں۔ ان سب کے باوجود بی جے پی کے قائدین، پسماندہ مسلمانوں کو قریب کرکے ’تقسیم کرو اور حکومت کرو‘ کی پالیسی پر عمل در آمد کریں گے۔ یہ ٹھیک ویسا ہی جیسا کہ انہوں نے شیعہ اور بوہرہ سماج کے ساتھ کیا ہے۔ اس کے ساتھ ہی وہ مسلمانوں کے درمیان موجود ناقابل انکار طبقاتی تگ ودو (باوجود اس کے کہ ہندوؤں کے طبقاتی امتیاز کے مقابلے میں یہ ناقابل ذکر ہے) کا فائدہ اٹھائیں گے۔ یوپی میں حالیہ لوکل باڈی انتخابات میں بی جے پی نے 395 مسلم امیدوار کھڑا کیے تھے جن میں 61 نے اپنی جیت درج کرائی تھی۔ 395 میں سے تین چوتھائی امیدوار پسماندہ برادریوں سے تعلق رکھتے تھے، اس کے برعکس گزشتہ لوکل باڈی انتخابات میں پارٹی نے صرف 180 امیدوار کھڑے کیے تھے جن میں صرف ایک نے جیت درج کرائی تھی۔
 (کلیارسن اے، مدراس انسٹیٹیوٹ آف ڈیولپمنٹ اسٹڈیز، چینائی میں اسسٹنٹ پروفیسر ہیں۔
جیفریلو CERI-Sciences Po/CNRS، پیرس میں سینئر ریسرچ فیلو ہیں، ساتھ ہی ساتھ انڈین پالیٹیکس اینڈ سوشیالوجی، کنگس انڈیا انسٹیٹیوٹ، لندن میں پروفیسر بھی ہیں۔)
 بشکریہ: انڈین ایکسپریس۔
***

***

 ہندوؤں کے مقابلے میں مسلمانوں میں ذات اور برادری کے خطوط پر کوئی قابل ذکر امتیاز نہیں پایا جاتا، ہندو ایک انتہائی غیر مساوی کمیونٹی ہیں جن میں صرف ان کی اعلی ذاتیں نفع میں ہیں جبکہ مسلمان اجتماعی محرومی کا شکار ہیں۔ ان سب کے باوجود بی جے پی کے قائدین، پسماندہ مسلمانوں کو قریب کرکے ’تقسیم کرو اور حکومت کرو‘ کی پالیسی پر عمل در آمد کریں گے۔ یہ ٹھیک ویسا ہی جیسا کہ انہوں نے شیعہ اور بوہرہ سماج کے ساتھ کیا ہے۔ اس کے ساتھ ہی وہ مسلمانوں کے درمیان موجود ناقابل انکار طبقاتی تگ ودو (باوجود اس کے کہ ہندوؤں کے طبقاتی امتیاز کے مقابلے میں یہ ناقابل ذکر ہے) کا فائدہ اٹھائیں گے۔

ہفت روزہ دعوت – شمارہ 10 ستمبر تا 16 ستمبر 2023