ای ڈی نے کیمپس فرنٹ آف انڈیا کے جنرل سکریٹری کو گرفتار کیا، سی ایف آئی نے ملک گیر احتجاج کا اعلان کیا
نئی دہلی، دسمبر 12: پاپولر فرنٹ آف انڈیا کی طلبا تنظیم کیمپس فرنٹ آف انڈیا نے ایک بیان جاری کرتے ہوئے کہا ہے کہ انفورسمنٹ ڈائریکٹوریٹ (ای ڈی) نے ان کے قومی جنرل سکریٹری رؤف شریف کو منی لانڈرنگ کی روک تھام (پی ایم ایل اے) کے سیکشن کے تحت گرفتار کیا ہے۔
طلبا تنظیم کیمپس فرنٹ آف انڈیا نے ای ڈی کی اس کارروائی کو متعصبانہ اور غیر قانونی قرار دیا ہے۔
کیمپس فرنٹ آف انڈیا نے گرفتاری کے خلاف ملک گیر احتجاج کا اعلان کرنے کے ساتھ ساتھ رؤف کی فوری رہائی کا مطالبہ کیا ہے۔
واضح رہے کہ منی لانڈرنگ کی روک تھام ایکٹ (پی ایم ایل اے) ایک مجرمانہ قانون ہے جو افسران کو عارضی تحقیقات، تفتیش اور جرمانے لگانے کا اختیار دیتا ہے۔
کیمپس فرنٹ آف انڈیا نے اپنے آفیشل ٹویٹر ہینڈل پر یہ معلومات شیئر کی ہیں کہ رؤف شریف کو آج کیرالہ کے تریویندرم انٹرنیشنل ایئرپورٹ سے گرفتار کیا گیا ہے۔
ED’s arbitrary detention of Campus Front national general secretary @RaufKadayil is outrageous: call for nation wide protest
Campus Front of India pic.twitter.com/dwmyaVPryR
— Campus Front of India (@CampusFrontInd) December 12, 2020
طلبا تنظیم نے الزام لگایا ہے کہ ’’بی جے پی کی منشا پر ای ڈی، سی اے اے-این آر سی مخالف مظاہروں کے سرگرم کارکنوں اور رہنماؤں کو دھمکانے کی کوشش کر رہی ہے۔‘‘
اپنے بیان میں کیمپس فرنٹ آف انڈیا نے کہا ہے کہ ’’حکومت ان تمام طلبا، سماجی کارکنوں اور تنظیموں کو نشانہ بنا رہی ہے جنھوں نے سی اے اے مخالف مظاہروں میں سرگرم کردار ادا کیا ہے۔‘‘
واضح رہے کہ انفورسمنٹ ڈائریکٹوریٹ (ای ڈی) نے پچھلے ہفتے پاپولر فرنٹ آف انڈیا (پی ایف آئی) کے ملک بھر میں 26 مختلف مقامات پر چھاپے مارے تھے، جس میں اس تنظیم کے رہنماؤں کے گھروں کی تلاشی بھی شامل ہے۔
پی ایف آئی نے ان چھاپوں کو غیر قانونی قرار دیا تھا۔