اجمیر: مسجد کے امام کا پیٹ پیٹ کر قتل، علاقائی باشندوں میں غم و غصہ

اجمیرنئی دہلی،27 اپریل :

راجستھان کے شہر اجمیر میں  ایک سنسنی خیز واقعہ پیش آیا ہے۔ جس میں  ایک مسجد کے امام کو پیٹ پیٹ کر قتل کر دیا گیا۔ رپورٹ کے مطابق ہفتہ کے روز علی الصبح رام گنج تھانہ علاقے میں واقع ایک مسجد میں گھس کر امام کو قتل کر دیا گیا۔ قتل کی وجوہات فی الحال معلوم نہیں ہو سکیں۔ معاملہ کی اطلاع موصول ہونے پر راج گنج تھانہ کی پولیس موقع پر پہنچی۔ اس واقعہ سے علاقہ کے لوگوں میں سخت غم و غصہ پایا جاتا ہے، جنہوں نے پولیس سے قاتلوں کو جلد تلاش کرنے اور سخت کارروائی عمل میں لانے کا مطالبہ کیا۔

ذرائع کے مطابق صبح تقریباً 3 بجے خان پورہ کنچن نگر میں واقع محمدی مدینہ مسجد میں تین نقاب پوش بدمعاش داخل ہوئے اور امام مولانا محمد ماہر کو لاٹھیوں سے پیٹ پیٹ کر قتل کر دیا۔ واقعہ کے وقت مولانا کے ساتھ پانچ چھ بچے بھی موجود تھے جنہیں حملہ آوروں نے ڈرا دھمکا کر وہاں سے باہر کر دیا۔

مقامی میڈیا نے رام گنج پولیس اسٹیشن کے انچارج رویندر سنگھ کھیری کے حوالے سے بتایا کہ یہ واقعہ اس وقت پیش آیا جب امام مسجد کے ساتھ والے کمرے میں چھ بچوں کے ساتھ سو رہے تھے۔پولیس کے مطابق، تین نقاب پوش افراد کمرے میں گھس گئے اور امام کو لاٹھی سے مارنا شروع کر دیا۔ بچوں نے پولیس کو بتایا کہ ملزمان نے انہیں کہا تھا کہ شور مچانے پر انہیں بھی قتل کر دیا جائے گا۔ حملہ آور امام کا موبائل فون بھی اپنے ساتھ لے گئے تاکہ بچے کسی کو اطلاع نہ دیں۔

واقعہ کی اطلاع ملتے ہی پولیس کی ٹیم موقع پر پہنچ گئی۔ پولیس نے مولانا محمد ماہر کی لاش کو جواہر لعل نہرو اسپتال کے سرد خانہ میں رکھوا دیا ہے۔ رام گنج تھانے کے افسر روندر سی سی ٹی وی کے فوٹیج کھنگالنے میں مصروف ہیں تاکہ حملہ آوروں کے بارے میں سراغ مل سکے۔

اتر پردیش کے رام پور کے رہنے والے محمد ماہر (52) گزشتہ سات سال سے یہاں درس و تدریس کے فرائض ادا کر رہے تھے۔ گزشتہ سال اکتوبر میں مسجد کے امام کی وفات کے بعد مولانا محمد ماہر امامت کی ذمہ داری بھی سنبھالنے لگے۔ پولیس کے اعلیٰ حکام بھی موقع پر پہنچ گئے ہیں۔ پولیس حملہ آوروں اور قاتلوں کی تلاش میں مصروف ہے۔