الیکشن کمیشن کے فیصلے کے خلاف ادھو ٹھاکرے کی عرضی پر سپریم کورٹ سماعت کیلئے رضامند

نئی دہلی،21فروری :۔
ایکناتھ شندے دھڑے کو شیوسینا کا انتخابی نشان دینے کے فیصلے کے خلاف ادھو ٹھاکرے سپریم کورٹ پہنچ گئے ہیں۔ سپریم کورٹ نے ادھو ٹھاکرے کی عرضی پر سماعت کے لیے رضامندی ظاہر کر دی ہے۔ میڈیا رپورٹوں کے مطابق الیکشن کمیشن کے فیصلے کے خلاف درخواست کی سماعت بدھ کو سہ پہر ساڑھے تین بجے ہوگی۔ ادھو ٹھاکرے کی جانب سے کپل سبل نے بدھ کو ہی درخواست پر سماعت کا مطالبہ کیا۔ انہوں نے کہا کہ اگر پروٹیکشن آرڈر نہ دیا گیا تو بینک اکاؤنٹس پر قبضہ کر لیا جائے گا۔ اس پر سی جے آئی ڈی وائی چندر چوڑ نے کہا کہ وہ بدھ کو سہ پہر 3.30 بجے اس معاملے کی سماعت کریں گے۔
ادھو ٹھاکرے گروپ نے اپنی درخواست میں کہا ہے کہ الیکشن کمیشن کا کردار منصفانہ نہیں رہا ہے۔ الیکشن کمیشن کا کام کرنے کا رویہ اس کے آئینی قد کے مطابق نہیں ہے۔ کمیشن نے نااہلی کی کارروائی کا سامنا کرنے والے ایم ایل اے کے دلائل کی بنیاد پر فیصلہ لے کر غلطی کی ہے۔ پارٹی میں تقسیم کے شواہد نہ ہونے پر کمیشن کا فیصلہ ناقص ہے۔ ادھو گروپ الیکشن کمیشن کے فیصلے پر فوری روک لگانے کا مطالبہ کر رہا ہے۔
قابل ذکرہے کہ سی جے آئی ڈی وائی چندرچوڑ کی سربراہی میں ایک آئینی بنچ شیو سینا میں دراڑ سے متعلق دیگر مسائل کی سماعت کر رہی ہے۔ اگرچہ سبل نے درخواست کی کہ اس معاملے کی آج ہی سماعت کی جائے، لیکن سی جے آئی چندرچوڑ نے یہ کہتے ہوئے اتفاق نہیں کیا کہ وہ سماعت سے پہلے فائلوں کو پڑھنا چاہتے ہیں۔
دریں اثنا کو شندے دھڑے نے سپریم کورٹ میں ایک کیویٹ دائر کرتے ہوئے مطالبہ کیا کہ اس کا موقف سنے بغیر کوئی یکطرفہ فیصلہ نہ لیا جائے۔ دراصل، جمعہ کو مرکزی الیکشن کمیشن نے اپنے فیصلے میں شیوسینا پارٹی اور شندے دھڑے کو انتخابی نشان استعمال کرنے کی اجازت دے دی تھی۔
ادھو ٹھاکرے دھڑے کی درخواست میں کہا گیا ہے کہ الیکشن کمیشن نے 1999 کے آئین پر غور کیا، جب کہ 2018 کا ترمیم شدہ آئین نافذ ہے۔ انہیں 2018 کے آئین کو ریکارڈ پر رکھنے کے لیے زیادہ وقت نہیں دیا گیا۔ 2018 کے ترمیم شدہ آئین کے مطابق، شیو سینا کے سربراہ پارٹی میں سب سے زیادہ اتھارٹی ہوں گے، جو کسی بھی عہدے پر تقرریوں کو روک سکتے ہیں، ہٹا سکتے ہیں یا منسوخ کر سکتے ہیں اور جن کے فیصلے تمام پارٹی معاملات پر حتمی ہوتے ہیں۔ لیکن 1999 کے آئین کے مطابق پارٹی سربراہ کو یہ اختیار نہیں تھا کہ وہ اپنے طور پر عہدیداروں کو نامزد کر سکے۔