اردو الفاظ کے استعمال پر ہندی نیوز چینلوں کو نوٹس  

دعوت ویب ڈیسک

نئی دہلی،20 ستمبر :۔

اب تک اردو نام والے شہروں علاقوں اور  اسٹیشنوں کے نام تبدیل کئے جانے کے مطالبات کئے جا رہے تھے ،اردو میں سائن بورڈ  لگانے پر اعتراض کیا جا رہا تھا لیکن اب ’اردو دشمنی‘ یہاں تک پہنچ گئی ہے کہ ٹی وی چینلوں پر اردو الفاظ سننا بھی گوارا نہیں ہے ۔معاملہ یہاں تک پہنچ گیا ہے کہ ہندی چینلوں کے ذریعہ اردو کے الفاظ استعمال کئے جانے پر باقاعدہ متعلقہ وزارت میں شکایت درج کرائی گئی ہے اور کارروائی کا مطالبہ بھی کیا گیاہے ۔اب اسے اردو سے حد درجہ نفرت نہیں کہا جائے گا تو پھر کیا کہا جائے گا۔اس پر مزید اطلاعات و نشریات کی وزارت نے  اس شکایت پر سر گرمی کا مظاہرہ کرتے ہوئے  ہندی نیوز چینلوں کے خلاف اہم کارروائی  بھی کر دی ہے۔ 9 ستمبر 2025 کو درج کی گئی شکایت کی بنیاد پر، وزارت نے پانچ بڑے نیوز چینلز کو باضابطہ نوٹس جاری  کر دیا  ہے۔

دی وائر کی رپورٹ کے مطابق ایس کے تھانے (مہاراشٹرا) کے رہنے والے سریواستو نےگزشتہ  9 ستمبر 2025 کو سی پی جی آر اے ایم ایس  پورٹل پر ایک شکایت درج کرائی، جس میں الزام لگایا گیا کہ ہندی نیوز چینل ٹی وی نائن بھارت ورش،آج تک،اے بی پی نیوز،زی نیوزاور ٹی وی 18  اپنی نشریات میں تقریباً 30% اردو الفاظ استعمال کر رہے ہیں۔وزارت کی جانب سے جاری نوٹس میں اردو کا ذکر نہیں ہے لیکن کہا گیا ہے کہ ہندی کا غلط استعمال کیا جا رہا ہے ۔

رپورٹ کے مطابق شکایت کنندہ کا دعویٰ ہے کہ یہ چینل ہندی نیوز چینل ہونے کا دعویٰ کرتے ہیں لیکن اپنی روزمرہ کی کمنٹری میں دوسری زبانوں کا استعمال کررہے ہیں، جو عوام کے ساتھ دھوکہ دہی اور مجرمانہ فعل ہے۔ انہوں نے مطالبہ کیا کہ ان چینلز کو ہدایت کی جائے کہ وہ زبان کے ماہر ین کا تقرر کریں اور اس کا سرٹیفکیٹ اپنی ویب سائٹ پر شیئر کریں۔

رپورٹ کے مطابق خود کو ماہر قانون ہونے کا دعویٰ کرنے والے ایس کے سریواستو کا کہنا ہے کہ  ہندی ٹی وی چینلز ‘بیٹھنے’ کے لیے ‘تشریف رکھئے’ اور باڑھ کے لیے ‘سیلاب’ جیسے الفاظ استعمال کرتے ہیں۔ ایک ہندی بولنے والا یہ سب کیسے سمجھ سکتا ہے؟ وہ مزید کہتے ہیں، "میرا ایک مقصد یہ یقینی بنانا ہے کہ ہندی بولنے والے، ہندی میں بی اے، ایم اے، اور پی ایچ ڈی کی ڈگری ہولڈرس کو کام مل سکے ۔

  خود کو ماہر قانون ہونے کا دعویٰ کرنے والے ایس کے سریواستو کا کہنا ہے کہ  ہندی ٹی وی چینلز ‘بیٹھنے’ کے لیے ‘تشریف رکھئے’ اور باڑھ کے لیے ‘سیلاب’ جیسے الفاظ استعمال کرتے ہیں۔ ایک ہندی بولنے والا یہ سب کیسے سمجھ سکتا ہے؟

18 ستمبر 2025 کو، اطلاعات و نشریات کی وزارت کے انڈر سکریٹری نونیت کمار نے پانچ چینلز کو الگ الگ خط بھیجے، جس میں انہیں بتایا گیا کہ ان کے خلاف مبینہ طور پر غلط ہندی استعمال کرنے کی شکایت موصول ہوئی ہے۔خط میں واضح کیا گیا ہے کہ شکایت کی روشنی میں چینلز کے خلاف کیبل ٹیلی ویژن نیٹ ورکس (ترمیمی) رولز کے مطابق ضروری کارروائی کی ہدایت کی گئی ہے۔چینلز کو حکم دیا گیا ہے کہ وہ پندرہ دن کے اندر وزارت اور شکایت کنندہ کو شکایت پر کیے گئے فیصلے سے آگاہ کریں۔