نئی دہلی، دسمبر 24: اے این آئی کی خبر کے مطابق بہار کے موتیہاری میں جمعہ کی شام ایک اینٹوں کے بھٹے میں ہونے والے دھماکے میں نو افراد ہلاک اور آٹھ زخمی ہو گئے۔
یہ واقعہ ضلع کے رام گڑھوا علاقے میں پیش آیا۔ پولیس کے مطابق ہلاک ہونے والوں میں اینٹوں کے بھٹے کا مالک محمد اسرار بھی شامل ہے۔
بہار پولیس کے ایک بیان میں کہا گیا ہے کہ ’’ضلع مجسٹریٹ اور پولیس سپرنٹنڈنٹ موقع پر پہنچ گئے ہیں۔ ریسکیو آپریشن بھی جاری ہے۔‘‘
وزیر اعظم نریندر مودی اور بہار کے وزیر اعلی نتیش کمار نے اس واقعہ پر افسوس کا اظہار کیا ہے۔
وزیر اعظم نے ایک ٹویٹ میں کہا ’’موتیہاری میں اینٹوں کے بھٹے میں ہونے والے حادثے کی وجہ سے جانوں کے ضیاع سے دکھی ہوں۔ ہر مرنے والے کے لواحقین کو PMNRF کی طرف سے 2 لاکھ روپے دیے جائیں گے۔ زخمیوں کو پچاس ہزار روپے دیے جائیں گے۔‘‘
اس دوران نتیش کمار نے کہا کہ انھوں نے عہدیداروں کو ہدایت دی ہے کہ وہ زخمیوں کا مناسب علاج یقینی بنائیں۔ اے این آئی کے مطابق انھوں نے کہا ’’ ہم ان کی جلد صحت یابی کی خواہش کرتے ہیں۔‘‘