جے پور: کرسچن انسٹی ٹیوٹ پر بجرنگ دل کا حملہ ، سول سوسائٹی نے حملے کی مذمت کرتے ہوئے کارروائی کا مطالبہ کیا
جے پور،نئی دہلی ،25 ستمبر :۔
راجستھان میں متنازعہ تبدیلی مذہب بل کی منظوری کے بعد شدت پسند ہندو تنظیمیں مسلمانوں اور عیسائیوں کے خلاف سر گرم ہو گئی ہیں ۔متنازعہ تبدیلی مذہب بل کی منظوری کے بعد فرقہ وارانہ کشیدگی میں اضافہ نظر آ رہا ہے ۔نام نہاد اور شدت پسند ہندو تنظیمیں کسی نہ کسی بہانے مسلمانوں اور عیسائیوں کے ادارے پر حملے کر رہی ہیں ۔ تازہ معاملہ راجستھان کے جے پور کا ہے جہاں بجرنگ دل کے تقریباً 50 ارکان پر مشتمل غنڈوں کا ایک گروپ گزشتہ دنوں ہفتہ کی سہ پہر جے پور کے پرتاپ نگر میں واقع ہندوستان بائبل انسٹی ٹیوٹ (ایچ بی آئی) پر دھاوا بول دیا، اور عیسائی ادارے پر مذہبی فسادات کرانے کا الزام لگایا۔
یہ حملہ، جو کہ سہ پہر 3 بجے کے قریب ہوا،ایچ بی آئی کے دو اراکین کے سرکاری معائنہ کے دورے کے موقع پر ہوا- ایک چنئی میں تنظیم کے ہیڈکوارٹر سے اور دوسرا باگیڈورہ، بانسواڑہ سے۔ عینی شاہدین اور سول سوسائٹی کے نمائندوں کا الزام ہے کہ بجرنگ دل کے ارکان نے مہمانوں پر تبدیلی مذہب سے متعلق سرگرمیوں اور دھمکی اور غنڈہ گردی کی کارروائیوں میں ملوث ہونے کا الزام لگاتے ہوئے کشیدگی کی صورتحال پیدا کر دی۔
اس واقعہ کے بعد، پرتاپ نگر تھانہ کی پولیس نے پوچھ گچھ کے لیے آنے والے دوایچ بی آئی اہلکاروں کو حراست میں لے لیا اور ان کے موبائل فون ضبط کر لیے۔ مقامی ایچ بی آئی سربراہ سے تعلق رکھنے والے آلات—بشمول ایک لیپ ٹاپ، پین ڈرائیو، اور یہاں تک کہ انسٹی ٹیوٹ کا ٹیلی فون— بھی ضبط کر لیے گئے، ساتھ ہی ادارہ جاتی دستاویزات، بشمول جائیداد کے کاغذات وغیرہ بھی ضبط کر لیا گیا۔
سول سوسائٹی کے ایک وف نے اس سلسلے میں متعلقہ عہدیداروں سے ملاقات کی ۔وفد میں جے پور کرسچن فیلوشپ کے صدر جان میتھیو، فادر۔ وجے پال سنگھ، اس کے جوائنٹ سکریٹری، اور پیپلز یونین فار سول لبرٹیز (پی یو سی ایل) کی انسانی حقوق کی کارکن کویتا سریواستو شامل تھیں۔ گروپ نے اس واقعے کی مذمت کی ہے کہ ایک ہفتے کے اندر وزیر اعلیٰ کے اپنے حلقے میں اس طرح کا دوسرا حملہ ہے۔
اس سے قبل، 21 ستمبر کو، پرتاپ نگر میں ایک نجی گھر میں دعائیہ مجلس کے دوران پادری ڈینیئل پر مبینہ طور پر حملہ کیا گیا تھا۔ مسلسل احتجاج کے بعد ایف آئی آر درج کر لی گئی تاہم ابھی تک کوئی گرفتاری عمل میں نہیں آئی۔
کارکنوں کے مطابق، راجستھان میں عیسائیوں کو نشانہ بنانے کا یہ نواں واقعہ ہے جو کہ ریاست کے متنازعہ تبدیلی مذہب بل کی منظوری کے بعد پیش آیا ہے۔
(بشکریہ :انڈیا ٹو مارو)