سماجی اور معاشرتی عدم تعلق کا خوفناک چہرہ،بند کمرے سے خاتون کی مسخ شدہ لاش برآمد

دعوت ویب ڈیسک

نئی دہلی، 25 ستمبر:۔

راجدھانی دہلی کا جامعہ نگر علاقہ انتہائی گھنی اور مسلم اکثریتی علاقہ ہے ،یہیں پر عالمی شہرت یافتہ یونیور سٹی جامعہ ملیہ اسلامیہ بھی موجود ہے۔دہلی کا یہ علاقہ مسلمانوں کا سب سے تعلیم یافتہ علاقہ مانا جاتا ہے جہاں بڑی تعداد میں طلبا اور پروفیسر و ٹیچر رہتے ہیں۔یہی نہیں اس علاقے میں ملک کی سر گرم  دینی اور ملی تنظیموں کے ہیڈ کوارٹر بھی موجود ہیں۔بڑے بڑے تعلیمی انسٹیٹیو ٹ  موجود  ہیں ۔معروف دینی اور مذہبی ادارہ جامعہ اسلامیہ سنابل بھی یہیں پرہے۔لیکن گزشتہ دنوں اس گھنی مسلم آبادی میں ایک ایسا دلدوز واقعہ پیش آیا جس نے جھنجھوڑ کر رکھ دیا۔جامعہ کے ایک ریٹائرڈ ٹیچر کے گھر سے اس کی 65 سالہ بیوی کی مسخ شدہ لاش برآمد ہوئی ۔لاش کی حالت بتا رہی تھی کہ کئی دن پرانی ہے ۔یہ واقعہ ہمیں بتاتا ہے کہ ہم انسانوں کے اس بھیڑ میں کتنے تنہا ہیں۔در اصل یہ معاملہ ہمارا سماجی اور معاشرتی عدم تعلق کو ظاہر کرتا ہے۔جہاں انسانوں کی تو بھیڑ ہے اور بے حسی کا یہ عالم ہے کہ ہمیں اپنے پڑوسیوں کی بھی کوئی خبر نہیں ۔پانچ پانچ اور چھ چھ منزلہ عمارت میں دس دس بارہ بارہ فلیٹ ہیں اور ہر فلیٹ میں ایک خاندان رہائش پذیر ہے مگر المیہ یہ ہے کہ ہمیں سامنے رہنے والے خاندان سے کوئی تعلق نہیں،یہ دلدوز واقعہ ہماری اسی بے حسی کو ظاہر کرتا ہے ۔

واقعہ یہ ہے کہ  دہلی کے جامعہ نگر کے ایک اپارٹمنٹ سے ایک بزرگ خاتون کی مسخ شدہ لاش برآمد ہوئی ہے، جب کہ اس کے شوہر، جو جامعہ ملیہ اسلامیہ یونیورسٹی کے ریٹائرڈ میوزک ٹیچر ہیں، نازک حالت میں پائے گئے ہیں ۔حالانکہ  انہیں بچا لیا گیا ہے ۔پولیس کی اطلاع اور مقامی باشندوں نے بتایا کہ ان کا بیٹا، عمران عرف شیلی، جس کی عمر 50 کے قریب ہے، بھی گھر کے اندر موجود تھا۔ عمران ذہنی مریض ہے۔ وہ اندر سے بول رہا تھا لیکن دروازہ نہیں کھولا۔اطلاع کے مطابق  پولیس کنٹرول روم (پی سی آر) کو 21 ستمبر کی رات 11:10 بجے ایک فون کال موصول ہوئی جس میں انہیں جامعہ نگر کے غفار منزل میں ایک لاش پڑی ہونے کی اطلاع ملی۔پولیس کے مطابق فون کرنے والے نے بتایا کہ اس کی بہن اور بہنوئی جواب نہیں دے رہے تھے اور اس کا بیٹا دروازہ نہیں کھول رہا تھا۔

ڈپٹی کمشنر آف پولیس (ساؤتھ ایسٹ) ہیمنت تیواری نے کہا، "پولیس کو موقع پر پہنچ کر دروازہ توڑنا پڑا۔ اندر، انہیں آفتاب جہاں (65) کی مسخ شدہ لاش بستر پر ملی۔ اس کے شوہر سراج خان (70) اس کے پاس پڑے تھے، تشویشناک حالت میں۔ انہیں فوری طور پر آل انڈیا انسٹی ٹیوٹ آف میڈیکل سائنسز (  آئی ایم ایس) سینٹر لے جایا گیا۔

ڈپٹی کمشنر کا کہنا تھا کہ ‘سوال کے دوران بیٹا ٹھیک سے بات نہیں کر پا رہا تھا اور بار بار کہہ رہا تھا کہ اس کے والدین سو رہے ہیں، اس نے تین چار دن تک بغیر کچھ کھائے خود کو فلیٹ میں بند کر رکھا تھا اورمدد کیلئے کسی کو فون بھی کرنے کی حالت میں نہیں تھا۔انہوں نے کہا کہ ابتدائی طور پر خاتون کی موت بیماری کی وجہ سے قدرتی معلوم ہوتی ہے۔ لاش بری طرح گل چکی تھی اور کوئی بیرونی زخم نظر نہیں آرہا تھا۔ اطلاع کے مطابق  جوڑے کی بیٹی ہانگ کانگ میں رہتی ہے اور گزشتہ کچھ دنوں سے اپنے اہل خانہ سے رابطہ کرنے کی کوشش کر رہی تھی۔ جب وہ ان سے رابطہ نہ کرسکی تو اس نے اپنے ماموں، مقامی رہائشی ڈبلیو احمد خان سے اہل خانہ کے بارے میں دریافت کرنے کی درخواست کی، جس کے بعد اس نے پی سی آر کو فون کیا۔

اتنی گھنی آبادی میں ایک فلیٹ سے مسخ شدہ لاش بر آمد ہونا ہر فرد کے لئے حیران کن ہے۔آس پاس کے لوگوں کا کہنا ہے کہ بیوی اکیلے شوہر اور معذور بیٹے کو سنبھالتی تھی ۔بہت کم باہر نکلتی تھی ۔بیٹے کو بھی باہر نکلنے کی اجازت نہیں تھی۔رشتہ داروں سے بھی ان کا رابطہ بہت کم تھا۔یہ واقعہ ہماری انسانی بے حسی کو بیان کرتی ہے ۔فلیٹ تک سمٹی ہماری زندگی نے ہمیں اپنے پڑوسیوں اور رشتہ داروں سے اس قدر دور کر دیاہےاور اتنا لا تعلق بنا دیاہے کہ پڑوس میں کیا ہو رہا ہے کوئی خبر نہیں ۔یہ اس تعلیم یافتہ محلے کا حال ہے جہاں سب سے زیادہ پروفیسر اور ڈاکٹر قیام پذیر ہیں۔