فلسطین کو بطور ریاست تسلیم کرنے والے ممالک کی تعداد 140 ہو گئی

نیو یارک ،23 ستمبر :۔

غزہ اور فلسطین کا معاملہ اس وقت تاریخی مرحلے سے گزر رہا ہے ۔ایک طرف غزہ میں اسرائیلی بر بریت اور نسل کشی کا سلسلہ جاری ہے وہیں دوسری جانب دنیا بھر میں فلسطینیوں کی حمایت میں آنے والے ممالک کی تعداد میں اضافہ ہو رہا ہے ۔نیویارک میں اقوا م متحدہ کی جنرل اسمبلی کا 80 واں اجلاس  جاری ہے ۔اس اجلاس میں بھلے ہی فلسطینی رہنماؤں کو امریکہ کی جانب سے شرکت کی اجازت نہیں ملی ہے لیکن   فلسطینی ریاست کو تسلیم کرنے والے ممالک کی تعداد میں تیزی سے اضافہ ہوا ہے۔ گزشتہ چند دنوں میں 10 سے زائد ممالک نے فلسطین کو تسلیم کرنے کا اعلان کیا ہے۔ فرانس، کنیڈا، برطانیہ، آسٹریلیا، پرتگال اور بیلجیم جیسی عالمی طاقتوں نے فلسطین کو باضابطہ طور پر تسلیم کر لیا ہے جبکہ انڈورا، موناکو، لکسمبرگ، مالٹا اور سلووینیا جیسے یورپی ممالک بھی اس فہرست میں شامل ہو گئے ہیں۔

واضح رہے کہ اس وقت  فلسطین کو تسلیم کرنے والے اقوام متحدہ کے رکن ممالک کی تعداد اب 140 سے تجاوز کر چکی ہے۔ عالمی لیڈران اسے کو فلسطینی عوام کیلئے انصاف اور دو ریاستی حل کے قیام کی سمت ایک تاریخی قدم قرار دے رہے ہیں۔

گزشتہ ماہ کئے گئے اعلان کے مطابق، فرانسیسی صدر ایمانوئل میکرون نے 22 ستمبر کو جنرل اسمبلی کے اجلاس میں فلسطین کو تسلیم کرلیا۔ میکرون نے اس موقع پر عالمی لیڈران سے خطاب کرتے ہوئے کہا کہ”امن کا وقت آ گیا ہے کیونکہ ہمارے پاس اسے حاصل کرنے کیلئے اب بہت کم وقت رہ گیا ہے۔“ انہوں نے غزہ پر اسرائیل کی بمباری روکنے اور یرغمالیوں کو رہا کرنے کا مطالبہ کیا۔

واضح رہے کہ آسٹریلیا، برطانیہ اور کنیڈا 21ستمبر کو فلسطین کو تسلیم کرنے کا اعلان کر چکے ہیں جبکہ پرتگال نے بھی فلسطین کو بطور ریاست شناخت کرنے کیلئے تیار ہے۔ اقوام متحدہ کے اجلاس میں لکسمبرگ، مالٹا، انڈورا اور موناکو جیسے ممالک نے بھی فلسطین کو تسلیم کرنے کا اعلان کیا اور اسے ایک اخلاقی اور تاریخی قدم قرار دیا۔

اقوام متحدہ کے سیکریٹری جنرل انتونیو غطریس نے اجلاس میں انتہائی سخت الفاظ میں اسرائیلی پالیسیوں کی مذمت کی۔ انہوں نے مغربی کنارے میں غیر قانونی بستیوں، آباد کاروں کے ذریعے تشدد اور الحاق کی دھمکیوں کو ”اخلاقی، قانونی اور سیاسی طور پر ناقابل برداشت“ قرار دیا۔

امریکہ نے فلسطینی حکام کو اس اجلاس میں شرکت کیلئے ویزا دینے سے انکار کردیا تھا جس کے بعد فلسطینی صدر محمود عباس نے ویڈیو پیغام کے ذریعے خطاب کیا۔ انہوں نے جنگ کے خاتمے کے ایک سال کے اندر صدارتی اور پارلیمانی انتخابات کرانے کا وعدہ کیا۔ عباس نے کہا کہ ”فلسطینی عوام جمہوریت اور اقتدار کی پرامن منتقلی پر مبنی ایک ریاست چاہتے ہیں۔“ انہوں نے مزید ممالک سے فلسطین کو تسلیم کرنے کی اپیل کرتے ہوئے کہا کہ ”جن ریاستوں نے اب تک فلسطین کو تسلیم نہیں کیا ہے ہم ان سے درخواست کرتے ہیں کہ وہ یہ قدم اٹھائیں۔“