بہار: نماز کے دوران تیز آواز میں ڈی جے بجانے سے منع کرے پر مسلم نوجوان پر حملہ
20 سالہ مسلم نوجوان محمد ابراہیم کے سر پر شدید چوٹیں آئیں،اسپتال میں داخل ،اہل خانہ نے قصور واروں کے خلاف کارروائی کا مطالبہ کیا
دعوت ویب ڈیسک
نئی دہلی ،22 ستمبر :۔
بہار کے مدھوبنی ضلع میں مذہبی جلوس کے دوران اونچی آواز میں ڈی جے میوزک پر جھگڑا تشدد کی شکل اختیار کر گیا۔ 20 سالہ مسلم نوجوان محمد ابراہیم کے سر پر شدید چوٹیں آئیں اور اسے علاج کے لیے اسپتال میں داخل کرایا گیا ہے۔
اطلاعات کے مطابق یہ واقعہ اس وقت پیش آیا جب محمد ابراہیم اپنی خالہ کے گھر پر تھااور بلند آواز میں موسیقی اور نعروں کے ساتھ ایک مذہبی جلوس مسجد کے قریب سے گزر رہا تھا۔جب نماز کا وقت ہوا، ابراہیم نے جلوس میں شامل لوگوں سے شائستگی سے درخواست کی کہ وہ یا تو آگے بڑھیں یا ڈی جے کی آواز کو کم کریں تاکہ نماز میں خلل نہ پڑے۔
لیکن معمولی تنازعہ اچانک پرتشدد ہو گیا۔ الزام ہے کہ جلوس میں شامل ایک ہندوتوا کارکن نے اس کی نماز کی ٹوپی چھین لی، اسے پھینک دیا اور اس کے سر پر زور سے مارا، جس سے ابراہیم شدید زخمی ہو کر زمین پر گر گیا۔اہل خانہ کے مطابق ابراہیم بالکل اکیلا تھا اور اس نے صرف والیوم کم کرنے کی درخواست کی تھی۔ ان کے بھائی نے کہا کہ یہ حملہ انتہائی سفاکانہ اور یک طرفہ تھا۔زخمی ابراہیم کو فوری طور پر مدھوبنی کے ایک اسپتال میں داخل کرایا گیا، جہاں ڈاکٹروں نے اس کی حالت تشویشناک لیکن مستحکم بتائی۔
اہل خانہ نے پولیس میں شکایت درج کراتے ہوئے قصورواروں کے خلاف سخت کارروائی کا مطالبہ کیا ہے۔ تاہم یہ رپورٹ لکھے جانے تک پولیس کی جانب سے کوئی سرکاری بیان جاری نہیں کیا گیا ہے۔اس حملے سے مقامی مسلمانوں میں غم و غصہ پھیل گیا ہے۔ سماجی اور مذہبی تنظیموں نے واقعے کی مذمت کرتے ہوئے کہا ہے کہ یہ اقلیتوں کی مذہبی آزادی پر حملہ ہے اور انتظامیہ کو قصورواروں کے خلاف فوری کارروائی کرنی چاہیے۔