لندن ،ویمبلے ایرینامیں 60 سے زیادہ عالمی ستاروں  کا اجتماع،غزہ متاثرین کیلئے فنڈ اکٹھا کیا گیا

دعوت ویب ڈیسک

لندن،20 ستمبر :۔

غزہ میں مظلومین کیلئے دنیا بھر میں انصاف پسند طبقہ آواز بلند کر رہا ہے ۔مختلف طریقوں سے لوگ مظلومین کے ساتھ یکجہتی کا اظہار کر رہے ہیں اور  ان کیلئے امدادارسال کر رہے ہیں۔ اسی سلسلے میں گزشتہ روز 17 ستمبر کو برطانیہ کی راجدھانی لندن  میں واقع ویمبلے ایرینا اسٹیڈیم میں دنیا بھر سے 60 سے زائد بین الاقوامی ستاروں کا اجتماع ہوا ۔ بدھ کی رات منعقد اس اجتماع میں  12,000 سے زیادہ افراد نے شرکت کی اور یہ پروگرام فلسطینی مظلومین کے ساتھ اظہار یکجہتی  کرنے والا اور غزہ کے لئے فنڈ جمع کرنے والا برطانیہ کا سب سے بڑا کنسرٹ بن گیا ۔

میڈیا رپورٹوں کے مطابق پانچ گھنٹے تک جاری رہنے والے اس پروگرام میں 60 سے زیادہ بین الاقوامی فنکاروں، اداکاروں اور ثقافتی شخصیات  نے شرکت کی ، جس میں موسیقی، فلم اور دیگر شعبوں سے متعلق فنکاروں نے اپنی فنکاری کا مظاہرہ کر کے  غزہ میں بڑھتے انسانی بحران  کیلئے امداد اکٹھا کیا۔

میڈیا رپورٹس کے مطابق، منتظمین نے اعلان کیا کہ کنسرٹ نے فلسطینی زیرقیادت خیراتی اداروں کے لیے 1.5 ملین برطانوی پاؤنڈز اکٹھے کیے ہیں، جن میں فلسطین چلڈرن ریلیف فنڈ، فلسطینی میڈیکل ریلیف سوسائٹی اور  دیگر متعلقہ ادارے شامل ہیں۔

لیجنڈری موسیقار برائن اینو  کے ذریعہ  تیار کردہ ایگزیکٹو، کنسرٹ میں پال ویلر، ڈیمن البرن، پورٹیش ہیڈ، جیمی ایکس ایکس، جیمز بلیک، باسٹیل، پنک پینتھریس، اور نادین شاہ کی پرفارمنس پیش کی گئی۔ فلسطینی فنکاروں ایلیانا، سینٹ لیونت، ال فار تھری، اور ڈی جے سماء عبدالہادی نے بھی سٹیج سنبھالا، اس دوران  حالیہ فضائی حملوں میں اپنی جانیں گنوانے والے فلسطینی مصوروں کے فن کی نمائش  بھی پیش کی گئی۔

اس موقع پر اقوام متحدہ کی خصوصی نمائندہ فرانسسکا البانی نے غزہ اور مغربی کنارے میں جاری انسانی بحران پر روشنی ڈالتے ہوئے حاضرین سے خطاب کرتے ہوئے کھڑے ہو کر تمام فنکاروں کو داد دی اور خراج تحسین پیش کیا۔