شرمناک: تلک لگایا نئے کپڑے پہنائے اور نوزائیدہ بچی کو زندہ دفن کر دیا

دعوت ویب ڈیسک

نئی دہلی،17 ستمبر :

ہم اکیسویں صدی میں ہیں  ،یہ ایک ترقی یافتہ اور تعلیمی یافتہ صدی کہی جاتی ہے مگر افسوس ایسے انسانیت سوز واقعات سامنے آ رہے ہیں  جو نہ صرف انسانیت کے نام پرکلنک اور بد نما داغ ہیں بلکہ انسانی رشتوں اور مقدس وقار کو مجروح کرنے والے ہیں۔ہم زمانہ جاہلیت میں اس طرح کے واقعات سنتے رہے ہیں جہاں بچیوں کو زندہ در گور کر دیا جاتا تھا اور یہ واقعات سن کر ہماری آنکھیں نم ہو جاتی ہیں ۔ہم آج ایسے واقعات کا تصور نہیں کر سکتے لیکن پھر جب ہمارے اس مہذب معاشرہ کا سچ ہمارے سامنے اچانک آتا ہے تو ہماری آنکھیں اور ہمارے دل و ذہن اسے قبول کرنے سے قاصر ہوتے ہیں کہ کیابچیوں کو زندہ دفن کرنے کے واقعات اکیسویں صدی کے مہذب معاشرے میں بھی پیش آ سکتے ہیں؟

اتر پردیش کے شاہجہاں پور میں گزشتہ روز اتوار کو گاؤں  والوں نے زمین میں زندہ دفن کی گئی نوزائیدہ بچی کے رونے کی جب آواز سنی تو انہیں یقین نہیں ہوا کہ کوئی ماں یا کوئی انسان ایسا بھی کر سکتا ہے۔شاہجہاں پور کے جیتی پور علاقے میں ندی کے کنارے مٹی میں دفن کی گئی ایک ہفتے کی نوزائیدہ بچی کی ہلکی سی کراہ نے نہ صرف اس کی زندگی بچائی بلکہ اس نے مہذب سماج اور انسانیت کا سیاہ چہرہ بھی بے نقاب کر دیا۔ جیتی پور کے گوہاور گاؤں کے لوگ صبح سحر خیزی کے لئے تھے اسی دوران ان کے کانوں میں ایک معصوم کے رونے کی آواز سنائی دی ۔شک ہوا تو آواز کی سمت بڑھے اور جو منظر سامنے تھا وہ دل دہلا دینے والا تھا۔ مٹی سے ایک ننھا ہاتھ باہر جھانک رہا تھا ۔ اس ہاتھ میں گہرے زخم تھے اور ہاتھ کا پنجا جنگلی جانوروں نے نوچ  کر زخمی کر دیا تھا ۔موقع پر موجود شخص نے مزید لوگوں اور پولیس کو اطلاع دی ۔ موقع پر پہنچے ایس آئی ایتیش تومر نے معصوم کو مٹی سے باہر نکالا ۔ بچی کی سانسیں چل رہی تھیں لیکن اس کی حالت سنگین تھی۔فوری طور پر اسے علاج کے لئے اسپتال پہنچایا گیا۔

ڈاکٹروں نے بتایا کہ بچی ایک ہفتے کی ہے ۔اس کی حالت سے اندازہ لگایا گیا کہ دفن کرنے والوں نے اسے سلیقے سے سجایا تھا۔اسے نئے کپڑے پہنائے تھے اور اس کی پیشانی پر ٹیکا بھی لگایا تھا ۔ایسا محسوس ہو رہا تھا دفن کرنے والوں نے اسے بڑے پیار سے سجایا اور سنوارا تھا پھر مٹی میں دبا دیا تھا۔پولیس والے جب اسے باہر نکال رہے تھے تو ایسا لگ رہا تھا کہ اسے کسی نے بڑی جلد بازی میں دفنایا ہو،دفنانے والوں کے ہاتھ بھی کانپے ہوں گے ،جلد بازی کی وجہ سے ہی پوری طرح مٹی بھی نہیں ڈال پائے اور اس کا ایک ہاتھ باہر رہ گیا جو اس کی زندگی کا سبب بن گیا۔کیسے لوگ ہوں گے جنہوں نے اپنے جگر گوشے کو اس طرح دفنانے کی ہمت اور کلیجہ پتھر کاکیا ہوگا؟

بچی کو سنگین حالت میں شاجہاں پور میڈیکل کالج میں داخل کرایا گیا ہے ،ملزمین کی تلاش جاری ہے اور واقعہ کا جلد انکشاف کیا جائے گا۔پولیس اس سلسلے میں قرب و جوار کے گاؤں اور اسپتالوں میں گزشتہ پندرہ دنوں میں ڈلیوری کیس کی جانچ کر رہی ہے ۔