بہارکے سابق پی ایف آئی سر براہ محمود عالم ندوی گرفتار

دعوت ویب ڈیسک

نئی دہلی ،13 ستمبر :۔

ممنوعہ پاپولر فرنٹ آف انڈیا (پی ایف آئی) کے بہار کے سابق سربراہ محمود عالم ندوی کو جمعہ کے روز کشن گنج ضلع سے گرفتار کیا گیا، وزیر اعظم نریندر مودی کے 15 ستمبر کو پورنیا کے طے شدہ دورے سے  دو دن قبل انہیں گرفتار کیا گیا ہے۔ریاستی اور مرکزی ایجنسیاں وزیر اعظم کے دورہ سے قبل اس گرفتاری کو ہم پیش رفت کے طور پر دیکھ رہی ہیں۔

حکام نے بتایا کہ 39 سالہ ندوی ہندوستان-بنگلہ دیش سرحد کے قریب ایک پرائیویٹ اسکول میں بطور استاد کام کر رہے ہیں۔ ان کا کہنا تھا کہ وہ 2022 میں عمان فرار ہو گئے تھے جب انسداد دہشت گردی اسکواڈ نے پٹنہ کے پھلواری شریف علاقے میں پی ایف آئی کے تربیتی کیمپ کا پردہ فاش کیاتھا۔

حکام کا دعویٰ ہے کہ انہوں نے اس سال مارچ میں خاموشی سے بہار واپسی سے پہلے انہوں نے آئی ایس آئی ایس اور بوکو حرام کے ساتھ رابطہ  بھی کیا تھا۔

ایک سینئر پولیس افسر نے بتایا کہ ندوی واپسی کے بعد سے ہی کشن گنج میں روپوش تھا۔ جمعرات کو، نیشنل انویسٹی گیشن ایجنسی (NIA) نے محو الدین پور، کشن گنج میں ان کے ایک ٹھکانے پر چھاپہ مارا، اور جسے حکام نے "قابل اعتراض دستاویزات” کے طور پر بیان کیا، اسے ضبط کیا۔

اصل میں کٹیہار ضلع کے ونشیتولا گاؤں کا رہنے والا، ندوی تین سال سے گرفتاری سے بچ رہا تھا۔ ان کی گرفتاری کو ریاستی اور مرکزی ایجنسیاں ایک "اہم پیش رفت” کے طور پر بیان کر رہی ہیں۔ خاص طور پر وزیر اعظم کے دورے سے قبل انڈیا-نیپال اور انڈیا-بنگلہ دیش سرحدوں پر سخت سکیورٹی کے پیش نظر ۔

واضح رہے کہ مرکزی وزارت داخلہ نے 2022 میں پی ایف آئی کی سرگرمیوں کو ملک مخالف قرار دیتے ہوئے اس پر پابندی لگا دی تھی۔ حکام  نے دعویٰ کیا کہ اس گروپ نے اپنے پھلواری شریف کیمپ میں ایک ’جہادی دستہ‘ قائم کیا تھا اور بہار کے سیمانچل علاقے میں اپنے نیٹ ورک کو پھیلایا تھا، جس میں کشن گنج، پورنیا، ارریہ اور کٹیہار شامل ہیں۔