اقوام متحدہ میں فلسطینی ریاست کے قیام کیلئے پیش کی جانی والی قرار داد کی 142 ممالک  کی حمایت

دعوت ویب ڈیسک

نئی دہلی ،13 ستمبر :۔

غزہ میں جاری بحران اور اسرائیل کے ذریعہ قطر پر کئے گئے حملے کے درمیان اقوام متحدہ میں جمعہ کو فرانس کی جانب سے پیش کی جانے والی دو ریاستی قرار داد کو دنیا بھر کے 142 ممالک نے حمایت کا اعلان کیا ۔ہندوستان نے بھی مسئلہ فلسطین کے پرامن حل اور دو ریاستی حل کے نفاذ سے متعلق "نیویارک ڈیکلریشن” کی توثیق کرنے والی اقوام متحدہ کی قرارداد کے حق میں ووٹ دیا ہے۔ فرانس کی جانب سے پیش کی جانے والی قرارداد کو جمعہ کو 142 ممالک کی حمایت سے منظور کیا گیا، جب کہ 10 نے اس کے خلاف ووٹ دیا اور 12 نے ووٹ نہیں دیا۔ مخالفت کرنے والوں میں اسرائیل، امریکہ، ارجنٹائن اور ہنگری شامل تھے۔

واضح رہے کہ یہ اعلامیہ سب سے پہلے جولائی میں اقوام متحدہ کے ہیڈ کوارٹر میں فرانس اور سعودی عرب کی مشترکہ صدارت میں منعقدہ ایک اعلیٰ سطحی بین الاقوامی کانفرنس کے دوران جاری کیا گیا تھا۔ یہ قرارداد عالمی رہنماؤں سے وعدہ کرتا ہے کہ "غزہ میں جنگ کے خاتمے کے لیے، دو ریاستی حل کے موثر نفاذ کی بنیاد پر اسرائیل فلسطین تنازع کے منصفانہ، پرامن اور دیرپا تصفیے کے حصول کے لیے، اور فلسطینیوں، اسرائیلیوں اور خطے کے تمام لوگوں کے لیے ایک بہتر مستقبل کی تعمیر کے لیے اجتماعی اقدام کریں۔

قرارداد میں اسرائیل سے مطالبہ کیا گیا ہے کہ وہ ایک خودمختار اور قابل عمل فلسطینی ریاست کو یقینی بناتے ہوئے دو ریاستی حل کے لیے "واضح عوامی عزم” کرے۔ اس میں اسرائیل پر یہ بھی زور دیا گیا ہے کہ وہ "فلسطینیوں کے خلاف تشدد اور اشتعال انگیزی کو فوری طور پر بند کرے، مشرقی یروشلم سمیت مقبوضہ فلسطینی علاقے میں تمام آباد کاری، زمینوں پر قبضے اور الحاق کی سرگرمیاں روک دے، کسی بھی الحاق کے منصوبے یا آباد کاری کی پالیسی کو ترک کرے، اور آباد کاروں کے تشدد کو ختم کرے۔

اعلامیہ میں فلسطینی عوام کے حق خود ارادیت کی تصدیق کی گئی ہے اور خبردار کیا گیا ہے کہ دو ریاستی حل اور بین الاقوامی ضمانتوں کی جانب ٹھوس اقدامات کے بغیر، "تنازعہ مزید گہرا ہو جائے گا اور علاقائی امن ناپید رہے گا۔ اعلامیے میں کہا گیا ہے کہ "حالیہ پیش رفت نے ایک بار پھر، اور پہلے سے کہیں زیادہ خوفناک انسانی جانوں اور علاقائی اور بین الاقوامی امن و سلامتی کے لیے مشرق وسطیٰ کے تنازعے کے جاری رہنے کے سنگین مضمرات کو اجاگر کیا ہے۔

اس اعلامیہ میں یہ بھی واضح کیاگیا ہے کہ "غزہ میں جنگ اب ختم ہونی چاہیے”۔ کسی بھی قبضے،محاصرے،جبری نقل مکانی کو مسترد کرتے ہوئے  کہا گیا ہے کہ غزہ ایک "فلسطینی ریاست کا اٹوٹ حصہ ہے اور اسے مغربی کنارے کے ساتھ متحد ہونا چاہیے۔