ممبئی :’لشکر جہادی ‘کے نام سےبم دھماکوں کی دھمکی دینے والااشونی کمار نوئیڈا سے گرفتار
ممبئی ٹریفک پولیس کی واٹس ایپ ہیلپ لائن پر بھیجے گئے دھمکی آمیز پیغام میں 400 آر ڈی ایکس کے ساتھ 14 دہشت گردوں کے ممبئی میں داخل ہونے کا دعویٰ کیا گیا تھا
نئی دہلی ،نوئیڈا، 6 ستمبر :۔
ممبئی میں ان دنوں گنیش اتسو جاری ہے،آج اننت چتردشی کے دن ہر طرف بھیڑ ہے۔ایسے میں سیکورٹی اہلکار بھی ڈٹےہوئے ہیں دریں اثنا ممبئی میں 400 کلوگرام آر ڈی ایکس سے جگہ جگہ بم دھماکے کرنے کی دھمکی کامیسج موصول ہوتا ہے جس کے بعد انتظامیہ میں ہلچل مچ جاتی ہے ۔سیکورٹی ادارے سر گرمی سے جانچ شروع کر دیتے ہیں اور بالآکر دھمکی دینے والے اشونی نامی شخص کو اتر پردیش اور ممبئی پولیس نے ہفتہ کو ایک مشترکہ کارروائی میں نوئیڈا سے گرفتار کر لیا ۔ ممبئی پولیس اس کے ساتھ مہاراشٹر روانہ ہوگئی۔ ممبئی ٹریفک پولیس کی واٹس ایپ ہیلپ لائن پر بھیجے گئے دھمکی آمیز پیغام میں "لشکر جہادی” نامی تنظیم کا ذکر کیا گیا تھا۔
در اصل اس معاملے میں بھی وہی اسلامو فوبیا اور مسلمانوں کو بد نام کرنے کا معاملہ سامنے آیا ہے ۔ اشونی کمار نے ممبئی میں بم دھماکوں کی دھمکی جس نا م سے دی تھی وہ لشکر جہادی استعمال کیا تھا جس سے اس کا مقصد مسلمانوں کو بد نام کرنا اور پولیس اہلکاروں کو گمراہ کرنا بھی تھا۔
رپورٹ کے مطابق 04 ستمبر کو ممبئی پولیس کے واٹس ایپ نمبر پر بم دھماکے کی دھمکی کا پیغام بھیجا گیا جس میں دھمکی دینے والے شخص نے دعویٰ کیا کہ وہ ایک لشکر جہادی تنظیم کا رکن ہے۔ پولیس کمشنر کے میڈیا انچارج نے بتایا کہ گرفتار ملزم اشونی کمار سپرا اصل میں بہار کا رہنے والا ہے۔ وہ گزشتہ پانچ برس سے نوئیڈا میں رہ رہا تھا۔ اشونی خود کو نجومی بتاتا تھا لیکن اس کے اس عمل نے اس کے دعوے پر سوال کھڑے کر دیے ہیں۔ اشونی نے دھمکی دی تھی کہ کئی گاڑیوں میں بم رکھے گئے ہیں۔ ان میں 400 کلوگرام آر ڈی ایکس استعمال کیا گیا ہے۔ خود کو پاکستان کی جہادی تنظیم ’لشکر جہادی‘ کا رکن بتاتے ہوئے اس نے دعویٰ کیا کہ شہر میں 14 دہشت گرد داخل ہو چکے ہیں۔ اس نے یہ بھی کہا کہ 34 گاڑیوں میں 34’ہیومن بم‘ نصب کیے گئے ہیں۔
اگرچہ پولیس کو شک ہے کہ یہ ایک دھوکہ ہے، لیکن وہ اس معاملے کو پوری سنجیدگی سے دیکھ رہے ہیں۔ "ٹریفک پولیس کو ماضی میں اس طرح کے بم کے دھمکی آمیز پیغامات موصول ہوئے ہیں۔ایک سینئر افسر نے کہا کہ گھبرانے کی ضرورت نہیں ہے۔ اہم مقامات پر سیکورٹی بڑھا دی گئی ہے، اور کومبنگ آپریشنز جاری ہیں۔ ممبئی والوں سے اپیل کی جاتی ہے کہ وہ افواہوں پر یقین نہ کریں اور کسی بھی مشکوک سرگرمی کی اطلاع دیں۔