گنیش اتسوکے جلوس میں ’لو جہاد‘ کی جھانکی ،اُجین کے ماہی پور میں کشیدگی

نئی دہلی ،06 ستمبر :۔

ملک میں کوئی بھی ہندو اکثریت کا تہوار ہو بغیر مسلمانوں کے خلاف بیان بازی یا اشتعال انگیزی کے مکمل نہیں ہوتا ۔نفرت کا سلسلہ وقت کے گزرنے کے ساتھ ساتھ اس میں مزید اضافہ ہوتا جا رہا ہے ۔گنیش اتسو کے دوران مدھیہ پردیش کے اجین ضلع کے ماہی پور قصبے میں جمعہ کو اس وقت کشیدگی پھیل گئی جب بھگوان گنیش سواری کے جلوس میں "لو جہاد” کے موضوع پر مبنی جھانکی  شامل کیا گیا تھا۔

اقلیتی برادری کے ممبران نے اس  جھانکی  پر اعتراض کرتے ہوئے کہا کہ  نماز والی   ٹوپی، داڑھی اور برقعے میں ملبوس مجسمے ان کے مذہبی جذبات کو مجروح کرتے ہیں۔ عہدیداروں نے انہیں یقین دلایا کہ ان کے خدشات پر غور کیا جائے گا اور باضابطہ شکایت کی درخواست کی جائے گی۔

صورت حال اس وقت تک  مزید خراب ہو گئی جب جلوس موتی مسجد کے قریب پہنچا، جہاں کچھ نوجوانوں نے مبینہ طور پر پتھراؤ کیا۔ اجین ضلع کے پولیس سپرنٹنڈنٹ پردیپ شرما نے کہا، ’’متعلقہ گنیش سواری کا جلوس تقریباً 500 میٹر دور تھا جب کچھ نوجوانوں نے، جو اپنے چہرے چھپائے ہوئے تھے، جلوس کو لے جانے والے گروپ کے قریب پتھراؤ کیا۔‘‘

پولیس نے ہلکی طاقت کے ساتھ جوابی کارروائی کی اور فوری طور پر صورتحال پر قابو پالیا۔ مزید کشیدگی کو روکنے کے لیے فلیگ مارچ کیا گیا اور حساس علاقوں میں اضافی نفری تعینات کر دی گئی۔شرما نے مزید کہا، "صورتحال پرامن اور مکمل کنٹرول میں ہے۔ پتھراؤ کرنے والوں کی شناخت کر لی گئی ہے اور اس معاملے میں ایف آئی آر درج کرنے کی کارروائی جاری ہے۔