ہریانہ کے نوح میں دلت خاندان حلقہ بگوش  اسلام ، ہندوتو شدت پسند تنظیموں کا احتجاج

دعوت ویب ڈیسک

نئی دہلی ،05 ستمبر :۔

ہریانہ کا پسماندہ اور مسلم اکثریتی علاقہ کے طور پر معروف نوح میں  ایک دلت خاندان نے اسلام قبول  کر لیا ۔دلت خاندان کا اسلام قبول کرنا  انتہا پسند ہندوتوا تنظیموں  کیلئے ناراضگی کا سبب بن گیا۔انہوں نے شدید مخالفت  کی اور احتجاج کیا،یہی نہیں اس سلسلے میں  ہریانہ کے نوح میں پولیس میں شکایت  بھی کی گئی جس کے بعد پولیس نے مقدمہ درج کرلیا ہے۔

رپورٹ کے مطابق پانچ افراد پر مشتمل خاندان – چیترام، عمر 45 سال اب محمد، اس کی بیوی ریکھا اب رخسار اور ان کے تین بچوں نے بھی اسلام قبول کرنے کے بعد اپنے نام تبدیل کر لیے ہیں۔ ان کا کہنا تھا کہ انہوں نے اپنی مرضی سے اسلام قبول کیا ہے۔

تبدیلی مذہب  کی خبر چیترام  کے بھائی ستبیر  کے ذریعہ نگینہ پولیس اسٹیشن میں شکایت درج کرانے کے بعد معلوم ہوئی۔ ستبیر نے دعویٰ کیا کہ خاندان نے دباؤ میں اسلام قبول کیا اور دو افراد کے نام شاہد اور سراج الدین رکھے گئے۔

اس سے قبل چیترام نے ایک حلف نامے میں انکشاف کیا تھا کہ وہ اسلام سے متاثر ہیں اور انہوں نے قبول کر لیا ہے۔ انہوں نے کہا کہ اسلام کی خوبیوں سے متاثر ہو کر میں نے بغیر کسی خوف اور لالچ کے اپنے خاندان سمیت اسلام قبول کیا ہے، اب ہمارا   اپنے سابقہ مذہب سے کوئی تعقل نہیں ہے ۔

نوح کی عدالت میں اس جوڑے کی ویڈیوز آن لائن وائرل ہوئی ہیں جس میں یہ دعویٰ کیا گیا ہے کہ انہوں نے  اپنی مرضی سے مذہب اسلام قبول کیا ہے۔ الزامات کو مسترد کرتے ہوئے، انہوں نے مجسٹریٹ سے کہا، "ہمیں کسی نے مجبور نہیں کیا، ہم اس مذہب (اسلام) پر عمل کرتے رہیں گے۔

ان کے بیانات کے باوجود ایف آئی آر کے اندراج کے بعد انتہا پسند ہندوتوا تنظیموں نے نگینہ تھانے کے باہر احتجاج کیا۔ وہ بڑی تعداد میں جمع ہوئے اور انہوں نے مسلم گروپوں پر الزام لگایا کہ وہ علاقے میں ہندوؤں کی "منصوبہ بند اور منظم  دھرم پریورتن کرا رہے ہیں۔

رپورٹ کے مطابق اس سلسلے میں ایک پنچایت بھی منعقد کی گئی جہاں مقامی رہنماؤں نے حکام کو خبردار کیا کہ اگر وہ کارروائی کرنے میں ناکام رہے تو وسیع پیمانے پر احتجاج کیا جائے گا۔ خاندان کے واضح دعوے کے باوجود، رہنماؤں نے کہا، "کمزور طبقات کے لوگوں کو نشانہ بنایا جا رہا ہے۔”پنچایت  ریاستی حکومت کو میمورنڈم پیش کرنے کا فیصلہ کرتے ہوئے اختتام پذیر ہوئی۔

پولیس حکام نے بتایا کہ چیترام کا خاندان عدالت میں پیشی کے بعد سے روپوش ہو گیا ہے اور ہو سکتا ہے کہ وہ اپنی جان کو لاحق خطرات کا حوالہ دیتے ہوئے تحفظ کی تلاش میں ہوں۔

واضح رہے کہ نوح کے مروڑہ گاؤں میں تقریباً 6,000  لوگوں کی آبادی ہے  ، جن میں زیادہ تر مسلمان ہیں، جن میں صرف 15 درج فہرست ذات کے ہندو خاندان ہیں۔ چیترام کی تبدیلی مذہب نے اب چھوٹی برادری کو ایک وسیع سیاسی اور سماجی طوفان کے مرکز میں کھڑا کر دیا ہے۔