بہار میں ایس آئی آر نہیں این آر سی ہو رہا ہے

دعوت ویب ڈیسک

نئی دہلی ،31 اگست :۔

بہار  میں انتخابی فہرستوں  کا متنازعہ اسپیشل انٹینسیو ریویژن (SIR)  جاری ہے۔ایک طرف اپوزیشن جماعتوں کی جانب سے ووٹر ادھیکار ریلی کا انعقاد کر کے اس کی مخالفت کی جا رہی ہے وہیں دوسری جانب الیکشن کمیشن آف انڈیا رائے دہندگان سے شہریت ثابت کرنے کیلئے دستاویزات جمع کرانے کیلئے نوٹس جاری کر رہا ہے ۔جو دستاویزات طلب کئے جا رہے ہیں اس سے اپوزیشن اور خاص طور سے مسلمانوں کی جانب سے ایس آئی آر کو این آر سی ہونے کے دعوے کو تقویت مل رہی ہے ۔جس طرح الیکشن کمیشن نے  ایس آئی آر  کے  دوران، بھارت-نیپال اور بھارت-بنگلہ دیش سرحدوں  سے ملحق  آٹھ مسلم اکثریتی اضلاع کو نوٹس جاری کئے ہیں اس سے یہ دعویٰ مضبوط ہوتا جا رہا ہے کہ مرکزی حکومت الیکشن کمیشن کے ساتھ مل کر بہار میں ایس آئی آر نہیں کر رہا ہے بلکہ ایس آئی آر کے نام پر این آر سی کر رہا ہے ۔  الیکشن کمیٹی آف انڈیا (ای سی آئی) کے ذرائع کا کہنا ہے کہ کاغذی کارروائی میں  نقص، غلط دستاویزات جمع کرانے اور درخواست دہندگان کی شہریت کے بارے میں شکوک و شبہات کی وجہ سے یہ کارروائی کی گئی۔

جن اضلاع کو الیکشن کمیشن نے شہریت ثابت کرنے والے دستاویزات جمع کرانے کیلئے نوٹس جاری کیا ہے ان اضلاع  میں مشرقی چمپارن، مغربی چمپارن، مدھوبنی، کشن گنج، پورنیہ، کٹیہار، ارریہ اور سپول  شامل ہیں۔ ان علاقوں میں زیادہ تر مسلمانوں اور دلتوں کا غلبہ ہے اور تیزی سے تصدیق ہو رہی ہے۔

حکام کے مطابق، ان اضلاع میں الیکٹورل رجسٹریشن آفیسرز (EROs) نے اس ہفتے کے شروع میں درخواستوں کی جانچ پڑتال شروع کی اور نوٹس جاری کر دیے۔ سماعت اگلے ہفتے ہو گی۔ پہلا 3 ستمبر کو رکسول میں ہوگا، اس کے بعد 7 ستمبر کو مدھوبنی ہوگا۔

ہر نوٹس میں کہا گیا ہے کہ فہرستوں میں درخواست دہندگان کی طرف سے جمع کرائے گئے دستاویزات غیر اطمینان بخش ہیں اور وصول کنندہ کو ہدایت  کی جاتی  ہے کہ وہ مخصوص تاریخ، وقت اور مقام پر اصل کاغذات کے ساتھ ای آر او کے سامنے حاضر ہوں۔الیکشن کمیشن آف انڈیا کے 24 جون کے حکم کے تحت، ای آر او کو تمام دعووں کی تصدیق کرنے، از خود کارروائی شروع کرنے اور کسی بھی ووٹر کو نوٹس بھیجنے کا اختیار حاصل ہے۔اگر کسی ووٹر کا نام حتمی فہرست سے حذف کر دیا جاتا ہے، توای آر او  کو ہٹانے کی وجوہات کی تفصیل کے ساتھ ایک سپیکنگ آرڈر جاری کرنا ہوگا۔