دھوکے سے مسلم لڑکیوں سے شادی کرنے والے روی کمار کی گرفتاری پر میڈیا میں خاموشی

نئی دہلی ،27 اگست :۔

عام طور پر مسلم نوجوان کے ذریعہ کسی ہندو لڑکی کے شادی کرنے کو لے کر لو جہاد  کا نام دیا جاتا ہے اور اس پر جم کر ہنگامہ کیا جاتا ہے لیکن حیدر آباد پولیس نے ایک حیران کن معاملے کا انکشاف کیا ہے ۔حیدر آباد پولیس نے  این روی نام  کے ایک ہندو نوجوان کو گرفتار کیا ہے جو خود کو مسلم بتا کر مسلم لڑکیوں کو پھنساتا تھا اور ان سے شادی کرتا تھا۔حیران کن طریقے سے اس کی تیسری بیوی کی شکایت کے بعد معاملے کا انکشاف ہواہے ۔ حیدرآباد پولیس نے ای۔این۔ روی کمار عرف رفیع کے خلاف ایف آئی آر درج کی ہے۔الزام ہے کہ اس نے اپنی پچھلی دوشادیاں چھپا کر اپنی تیسری بیوی کو دھوکہ دیا اور ڈرایا دھمکایا۔پولیس اب مزید تحقیقات کر رہی ہے کہ اس نے اور کتنی لڑکیوں کو اپنا شکار بنایا ہے ۔حیرت انگیز طور پر مسلم لڑکے اور ہندو لڑکی کی شادی پر ہنگامہ کرنے والا میڈیا اس معاملے میں بالکل خاموش ہے کہیں کوئی بحث نہیں ہو رہی ہے ۔

رپورٹ کے مطابق پولیس  نے بتایا کہ  روی جو اٹاپور کا رہائشی ہے۔ان نو عمر مسلم طالبات کو نشانہ بناتا ہے، جو عموماً اس سے 14 سے 18 سال چھوٹی ہوتی ہیں۔ اس  نے مبینہ طور پر انہیں رشتے میں پھنساتا، نجی ویڈیوز اور آڈیو گفتگو ریکارڈ کرکے بلیک میل کرکے شادی پر مجبور کرتا تھا۔

روی نے متاثرہ لڑکیوں سے ملنے کے وقت اپنا نام روی کمار سے بدل کر رفیع رکھ لیا تھا۔ اس نے مبینہ طور پر اسی طریقے سے تین خواتین کو جال میں پھنسایا اور شادی کی۔اس کی تیسری بیوی، جو ہراسانی برداشت نہیں کر سکی، پولیس کے پاس پہنچی اور شکایت درج کرائی۔ اس کے بیان کی بنیاد پر پولیس نے اس کے خلاف دھوکہ دہی اور مجرمانہ دھمکیوں کا مقدمہ درج کیا۔

تمام متاثرہ خواتین، جو نو عمر مسلم لڑکیاں تھیں، سماجی دباؤ اور بدنامی کے خوف کی وجہ سے اپنے گھروالوں کو ظلم کے بارے میں نہیں بتا رہی تھیں۔روی خاص طور پر کالجوں میں پڑھنے والے مسلم بچیوں کو نشانہ بناتا ۔ان کی گفتگو کی ریکارڈنگ کرکے یا پرائیویٹ ویڈیو بنا کر انہیں بلیک میل کرتا تھا۔پولیس اب اس بات کی بھی تحقیقات کر رہی ہے کہ کیا روی نے اسی طریقے سے مزید خواتین کو بھی نشانہ بنایا ہے۔