شاہجہاں پور کے جلال آباد  کا نام تبدیل کرنے کو مرکز نے منظوری دی  

نئی دہلی، 20 اگست  :

اتر پردیش مسلم شناخت والے علاقوں اور شہروں کے نام تبدیل کرنے کا سلسلہ جاری ہے ۔ یوگی حکومت نے اتر پردیش کے اتر پردیش کے شاہجہاں پور ضلع میں واقع شہر جلال آباد  کا نام تبدیل کرنے کی تجویز مرکز کو بھیجی تھی جسے مرکز نے منظوری دےدی ہے اور اب  نام بدل کر پرشورام پوری کر دیا گیا ہے۔ اس سلسلے میں جاری کردہ حکم نامے میں کہا گیا ہے کہ حکومت ہند کو اس نام کی تبدیلی پر کوئی اعتراض نہیں ہے اور ریاستی حکومت ضروری گزٹ نوٹیفکیشن جاری کرے۔

اس فیصلے کے بعد، تجارت اور صنعت کے مرکزی وزیر مملکت اور پیلی بھیت کے ایم پی جیتن پرساد نے سوشل میڈیا پلیٹ فارم ایکس پر وزیر اعظم نریندر مودی، وزیر داخلہ امت شاہ اور اتر پردیش کے وزیر اعلی یوگی آدتیہ ناتھ کا شکریہ ادا کیا۔

انہوں نے لکھا، اتر پردیش کے شاہجہاں پور میں واقع جلال آباد کا نام بدل کر پرشورام پوری کرنے کی اجازت دینے کے لیے وزیر داخلہ امت شاہ کا تہہ دل سے شکریہ ۔

مقامی بی جے پی رہنماؤں نے   جشن مناتے ہوئے کہا کہ رہائشیوں نے طویل عرصے سے اس کو ہٹانے کا مطالبہ کیا تھا جسے وہ "غلامی” (غلامی) کی علامت قرار دیتے ہیں۔ جلال آباد کے ایم ایل اے ہری پرکاش ورما نے کہا، "یہاں کے لوگ چاہتے تھے کہ اس شہر کا نام بھگوان پرشورام کے نام پر رکھا جائے۔ مرکز نے ان کے جذبات کا احترام کیا ہے، جس میں جیتن پرساد کا کلیدی کردار ہے۔ بی جے پی کے ضلع جنرل سکریٹری انیل گپتا نے اس تبدیلی کو ایک "تاریخی کامیابی” قرار دیا جبکہ پرشورام جنم بھومی مندر کے مہنت برہمچاری ستیہ دیو نے اسے سناتن دھرم کے نظریے کی عکاسی کے طور پر خوش آمدید کہا۔

قابل ذکر ہے کہ اتر پردیش حکومت نے 27 جون کو اس نام کی تبدیلی کی تجویز مرکزی حکومت کو بھیجی تھی، جس پر وزارت داخلہ نے اپنی رضامندی دے دی ہے۔