نئی دہلی ،05 اگست :۔
جموں کشمیر کے سابق گورنر ستیہ پال ملک کا طویل علالت کے بعدآج یہاں دہلی کے رام منوہر لوہیا اسپتال میں انتقال ہو گیا ۔ان کی عمر 79 سال تھی ۔رپورٹ کے مطابق ستیہ پال ملک کو9 جولائی کو آئی سی یو میں داخل کیا گیا تھا۔ ستیہ پال ملک کےآفیشل ایکس اکاؤنٹ پر ان کی صحت کے متعلق ٹویٹس کئے جاتے رہتے تھے تا کہ ان کی صحت کے متعلق کوئی غلط معلومات نہ پھیلے۔ انہوں نے جون میں اپنے ایک ایکس پوسٹ میں بتایا تھا کہ انہیں گردے کے مسائل کی وجہ سے تقریباً ایک ماہ کیلئے اسپتال میں داخل کیا گیا ہے ۔
ستیہ پال ملک 24 جولائی 1946 کو پیدا ہوئے تھے۔ ان کا تعلق اتر پردیش کے باغپت ضلع کے ہسودا گاؤں سے تھا۔ وہ ایک جاٹ گھرانے میں پیدا ہوئے۔ انہوں نے میرٹھ کالج سے بیچلر آف سائنس اور ایل ایل بی کی ڈگریاں حاصل کیں۔ انہوں نے اپنے سیاسی کیریئر کا آغاز 1968-69 میں میرٹھ کالج کے طلبہ یونین کے صدر کے طور پر کیا۔
ستیہ پال ملک نے اگست 2018 سے اکتوبر 2019 تک جموں کشمیر کے آخری گورنر کے طور پر خدمات انجام دیں۔ ان کے دور میں آرٹیکل 370 کو منسوخ کرنے کا تاریخی فیصلہ 5 اگست 2019 کو لیا گیا، جس کے بعد جموں کشمیر کو مرکز کے زیر انتظام دوعلاقوں میں تقسیم کر دیا گیا۔ اس کے بعد وہ بہار اور میگھالیہ کے گورنر بھی رہے۔
آخری دنو ں میں وہ بی جے پی کے سخت ناقد ہو گئے تھے ۔ انہوں نے 2019 کے پلوامہ حملے میں سیکورٹی لیپس اور کیرو ہائیڈرو پاور پروجیکٹ میں مبینہ بدعنوانی کے مسائل پر کھل کر بات کی تھی۔اس کے بعد وہ مسلسل مرکزی حکومت کے متعدد مسائل میں تنقید کرتے رہے خاص طور پر کسانوں اور پہلوانوں کے معاملے میں انہوں نے کھل کر بی جے پی کی پالیسی کی تنقید کی ۔