وشال گڑھ  معاملہ : مہاراشٹر حکومت کو بامبے ہائی کورٹ کی پھٹکار

ممبئی ، 19 جولائی :

مہاراشٹر کے وشال گڑھ  گزشتہ  کچھ دنوں سے شرپسندوں کی جانب سے پر امن ماحول کو خراب کر کے فرقہ وارانہ کشید گی پیدا کرنے کے واقعات اور حکومت اور پولیس کے جانب دارانہ رویہ کا سخت نوتس لیتے ہوئے بامبے ہائی کورٹ نے ایک اہم فیصلہ دیا  ہے۔ جس میں عدالت نے واضح الفاظ میں خبردار کیا کہ اگر کوئی خلاف ورزی ہوتی ہے، تو عدالت سرکاری افسران پر بھاری پڑ جائے گی اور "متعلقہ افسران کو جیل میں ڈالنے سے نہیں ہچکچائے گی”۔

ہائی کورٹ نے جمعہ کو مہاراشٹر حکومت کی سرزنش کی اور کولہاپور کے وشال گڑھ قلعے کے آس پاس کی تمام مسماری سرگرمیوں پر مکمل پابندی عائد کر دی، جو گزشتہ ہفتے  ہندوتو شدت پسندوں کی ہنگامہ آرائی اور مسجد پر حملے کے بعد کشیدگی پیدا ہو گئی تھی۔

جسٹس بی پی کولاباوالا اور جسٹس ایف پی پونے والا پر مشتمل ایک ڈویژن بنچ نے نشاندہی کی کہ ریاستی حکومت مانسون کے موسم میں ڈھانچے کو گرانے کے اپنے ہی نوٹیفکیشن کی خلاف ورزی کر رہی ہے۔

ججوں نے سوال کیا کہ "آپ برسات کے موسم میں ڈھانچے کو کیسے گرا سکتے ہیں؟” اور یہ دوہری طور پر واضح کیا کہ "کوئی بھی ڈھانچہ ، چاہے وہ تجارتی ہو یا گھر کو اگلے احکامات تک نہیں گرایا جائے”۔

ایک موقع پر، جسٹس کولابوالا نے یہاں تک خبردار کیا کہ اگر کوئی خلاف ورزی ہوتی ہے، تو عدالت سرکاری افسران پر بھاری پڑ جائے گی اور "متعلقہ افسران کو جیل میں ڈالنے سے نہیں ہچکچائے گی”۔

یاد رہے کہ وشال گڑھ قلعہ کے آس پاس اور یہاں تک کہ قلعہ سے 3 کلومیٹر سے زیادہ دور واقع گجا پور گاؤں میں تقریباً 60-70 ڈھانچے کو گرا دیا گیا تھا، جس کے نتیجے میں فرقہ وارانہ کشیدگی پیدا ہوئی تھی۔

اس خطے میں 14 جولائی کو اقلیتی اور اکثریتی برادریوں کے درمیان کشیدگی بھڑک اٹھی اور اگلے ہی دن ریاستی محکمہ تعمرات عامہ ( پی ڈبلیو ڈی) حکام نے مسمار کرنے کی مہم شروع کی۔

وشال گڑھ قلعہ کے علاقے کے تین مقامی لوگوں – ایوب یو کاغذی، عبدالسلام کے ملنگ اور مراد محلدار – نے تشدد،  پولیس کی مبینہ بے عملی اور پی ڈبلیو ڈی کی مسماری پر الگ الگ درخواستیں دائر کی ہیں – جن کی دلیل ایڈووکیٹ ستیش تلیکر نے دی تھی۔

ایڈووکیٹ ستیش تلیکر نے جھڑپوں کے بارے میں عدالت کو بتایا، نیز یہ بھی نشاندہی کی کہ  کس طرح پریشان کن ماحول میں بلڈوزنگ ڈرائیو  کے ذریعے ،جس میں مکانات، دکانیں اور دیگر ڈھانچے کو لپیٹ میں لے لیا گیا، کس طرح دائیں بازو کے ‘بیرونی لوگوں’ کے ایک بڑے ہجوم نے مقامی لوگوں پر حملہ کیا،  کس طرح ایک مقامی مسجد پر چڑھ کر نقصان پہنچانے کی کوشش کی۔ مسجد میں توڑ پھوڑ کی اور مذہبی کتابوں کی بے حرمتی کی یہی نہیں مسجد کے بعد یہ متشدد ہجوم آس پاس کے مسلم گھروں پر حملہ کیا اور لوٹ مار کی ۔  انہوں نے بتایا کہ اس دوران وہاں موجود پولیس فورس تشدد کو روکنے کے لیے کچھ نہیں کر رہی تھی۔

کچھ ویڈیوز دیکھنے کے بعد، ججوں نے سرکاری وکیل سے پوچھا کہ تشدد پر کیا کارروائی کی گئی، وہاں کیا ہو رہا تھا اور وہ لوگ کون تھے – جنہیں عرضی گزاروں نے ‘شیو بھکت’ کہا تھا۔

ججوں نے کہا کہ اگرچہ ویڈیوز میں نظر آنے والے افراد سرکاری اہلکار نہیں تھے، لیکن انہوں نے اس بات پر زور دیا کہ "امن و امان برقرار رکھنا ریاست کی ذمہ داری ہے”، اور یہ جاننے کی کوشش کی کہ آیا کوئی ایف آئی آر درج کی گئی ہے یا کوئی کارروائی کی گئی ہے۔

عدالت نے وشال گڑھ قلعہ کے دائرہ اختیار میں واقع شاہوادی پولیس اسٹیشن کے سینئر انسپکٹر کو بھی ہدایت دی کہ وہ "29 جولائی کو ذاتی طور پر عدالت میں حاضر رہیں”، پوری صورتحال اور تشدد میں ملوث افراد کے خلاف کی گئی کارروائی کی وضاحت کریں۔

ریاستی حکومت کے چیف پلیڈر پریہ بھوشن کاکڑے نے دلیل دی کہ اہلکار صرف تجارتی ڈھانچے کو گرا رہے ہیں جنہیں عدالتوں نے کوئی تحفظ نہیں دیا، لیکن ججوں نے حکام کو عدالت کے اگلے حکم تک کسی بھی ڈھانچے کو منہدم کرنے سے روک دیا۔