یوپی : لکھیم پور کھیری میں اسکول کی عمارت پر فلسطینی پرچم لہرانے پر سات افراد کے خلاف مقدمہ درج

نئی دہلی ،02اگست :۔

اتر پردیش کی یوگی حکومت میں فلسطینی پرچم لہرانا سماج میں فرقہ وارانہ ہم آہنگی کو نقصان پہنچانے کے مترادف سمجھا جا رہا ہے ۔یہی وجہ ہے کہ جگہ جگہ فلسطینی پرچم لہرانے یا فلسطین کے حق میں مظاہرہ کرنے پر ہی مقدمات درج کئے جا رہے ہیں،تازہ معاملہ اتر پردی کے لکھیم پور کھیری کا ہے جہاں سات افراد کے خلاف اس لئے مقدمہ درج کر لیا گیا ہےکیونکہ انہوں نے فلسطینی پرچم لہرایا تھا۔

رپورٹ کے مطابق حکام نے  بتایا کہ گزشتہ روز پیر کو  اتر پردیش کے لکھیم پور کھیری ضلع میں پولیس نے ایک سرکاری اسکول کی عمارت پر فلسطینی پرچم لہرانے کے الزام میں سات افراد کے خلاف مقدمہ درج کیا ہے۔

یہ واقعہ اتوار کو لکھہا علی گنج گاؤں کے ایک اپر پرائمری اسکول میں پیش آیا۔ پولیس کے مطابق تین افراد جن کی شناخت صدام، بورا اور عنانے کے نام سے ہوئی ہے، چار دیگر افراد نے مبینہ طور پر اسکول کی عمارت پر جھنڈا لہرایا۔ایک اہلکار نے  دعویٰ کیا ہے کہ ، ’’جب کچھ گاؤں والوں نے اعتراض کیا، تو ملزمان نے ان کے ساتھ بدسلوکی کی اور دھمکیاں دیں۔

مقامی رہائشی سنجے ترویدی نے پھول بہار پولس اسٹیشن میں شکایت درج کرائی ہے۔ ان کے بیان کی بنیاد پر، پولیس نے بھارتیہ نیائے  سنہتا (بی این ایس) کی دفعات کے تحت ایک مقدمہ درج کیا ہے جس میں دشمنی کو بڑھاوا دینے، امن کی خلاف ورزی پر اکسانے کے لیے جان بوجھ کر توہین کرنے اور مجرمانہ دھمکی دینے سے متعلق ہے۔اہلکار نے مزید کہا، ’’معاملے کی تحقیقات کی جا رہی ہیں۔