یوپی: بی جے پی ایم ایل اے نے اپنی  ہی حکومت کو بتایا سب سے  بد عنوان

 نئی دہلی،22 مارچ :۔

روہنگیا اور بنگلہ دیشی شہریوں کے بہانے مسلمانوں کے خلاف نفرت اور اشتعال انگیز بیان دینے والا بی جے پی کا ممبر اسمبلی ان دنوں خود اپنی ہی حکومت سے نبرد آزما ہے۔ اتر پردیش کے لونی سے بھارتیہ جنتا پارٹی (بی جے پی) کے ایم ایل اے نے ریاست میں اپنی ہی پارٹی کی حکومت پر حملہ کرتے ہوئے اسے ‘اب تک کی سب سے کرپٹ حکومت’ قرار دیا۔  رپورٹ کے مطابق، ایم ایل اے نند کشور نے الزام لگایا ہے کہ سرکاری اہلکار وزیر اعلیٰ یوگی آدتیہ ناتھ کو گمراہ کر رہے ہیں اور سرکاری خزانے کو لوٹ رہے ہیں۔

خبر کے مطابق، کشور  پھٹے ہوئے کُرتے میں غازی آباد کلکٹریٹ میڈیا سینٹر پہنچے اور ایک پریس کانفرنس میں یہ تبصرہ کیا اور الزام لگایا کہ پولیس نے ان کے کپڑے پھاڑ  دیے۔ انہوں نے یہ بھی الزام لگایا کہ چیف سکریٹری نے ‘مہاراج جی’ (وزیر اعلیٰ آدتیہ ناتھ) پر ‘کالا جادو’ کر کے ان کے دماغ کو باندھ لیا ہے۔کشور نے کہا، ‘چیف سکریٹری دنیا کا سب سے کرپٹ افسر ہے۔ افسران نے ایودھیا میں زمین لوٹ لی ہے۔’

اپنی پارٹی کی قیادت والی حکومت پر حملہ کرتے ہوئے انہوں نے الزام لگایا کہ اتر پردیش میں بڑے پیمانے پرگئو کشی ہو رہی ہے اور لوگوں کو فرضی انکاؤنٹر میں مارا جا رہا ہے۔

در اصل یہ معاملہ اس وقت شروع ہوا جب نند کشور کے ذریعہ علاقے میں نکالی جا رہی کلش یاترا میں پولیس نےمداخلت کی اور اجازت نامہ نہ ہونے کی وجہ سے یاترا کو روکنے کی کوشش کی ۔ خبروں کے مطابق، بی جے پی ایم ایل اے کی جانب سے منعقد رام کتھا سے قبل لونی میں کلش یاترا نکالی جا رہی تھی۔ اس کلش یاترا میں خواتین کی بھی بڑی تعداد نے شرکت کی تھی۔ جس میں تیز آواز میں ڈی جے  بجایا جا رہا تھا۔ جب پولیس نے ہائی والیوم میں ڈی جے بجانے سے روکا تو ایم ایل اے کے حامی بھڑک گئے۔

بتایا گیا کہ ایم ایل اے نے کلش یاترا کی اجازت نہیں لی تھی۔ جبکہ ایم ایل اے کا کہنا ہے کہ انہوں نے اس کے لیے لونی کے ایس ڈی ایم سے اجازت لی تھی۔ بحث کے دوران ایم ایل اے کے حامیوں اور پولیس کے درمیان ہاتھا پائی ہو گئی۔ اس دوران بی جے پی ایم ایل اے نند کشور گرجر کے کپڑے بھی پھٹ گئے۔ پولیس اور ایم ایل اے کے حامیوں کے درمیان ہاتھا پائی کے دوران نند کشور گرجر دھرنے پر بیٹھ گئے۔اس دوران ایم ایل اے کے حامیوں نے جم کر ہنگامہ کیا اور پولیس کے خلاف نعرے بازی شروع کر دی۔ کافی دیر تک ہنگامہ جاری رہنے اور معاملہ بڑھنے کی اطلاع ملنےپر ایس پی موقع پر پہنچے۔

 تاہم، ایس پی نے تنازعہ کو حل کیا اور کلش یاترا کو جانے کو دیا۔ اس دوران نند کشور گرجر نے پھٹے ہوئے کپڑوں میں ہی کلش یاترا نکالی، لیکن اس واقعہ کے بعد بی جے پی ایم ایل اے پولیس انتظامیہ سے شدید ناراض ہوگئے۔