یوپی:جبراً تبدیلی مذہب کے الزام میں دو عیسائی گرفتار، فنڈنگ ​​کی تحقیقات کیلئے ایس آئی ٹی تشکیل

دعوت ویب ڈیسک

نئی دہلی ،16 ستمبر :۔

اتر پردیش میں یوگی حکومت  کے ذریعہ اقلیتوں کے خلاف مذہبی بنیاد پر کارروائی  کا سلسلہ جاری ہے ۔اس میں خاص طور پر جبراً تبدیلی مذہب کا الزام معمول کی کارروائی بنتی جا رہی ہے ،حالیہ دنوں میں متعدد مقامات پر جبراً تبدیلی مذہب کے الزا م میں متعدد مسلم نوجوانوں کو گرفتار کیا گیا ۔مسلمانوں کے ساتھ ساتھ اب عیسائیوں کو بھی جبراً تبدیلی مذہب کے الزام میں گرفتار کیا جا رہا ہے ۔ تازہ معاملہ اتر پردیش کے سیتا پور کا ہے جہاں پولیس نے پیر کو بتایا کہ اتر پردیش کے سیتا پور میں دو عیسائیوں کو مبینہ طور پر غیر قانونی مذہب تبدیل کرنے کے الزام میں گرفتار کیا گیا ہے۔

دی آبزرور پوسٹ کی رپورٹ کے مطابق پولیس سپرنٹنڈنٹ راجیش دویدی نے بتایا کہ ہرجیت اور سنیتا مسیح کو 15 ستمبر کو "بیماریوں کے علاج کے بہانے اور دیگر ترغیبات کے ذریعے لوگوں کو   تبدیلی مذہب  پر آمادہ کرنے” کے الزام میں حراست میں لیا گیا  ۔ پولیس نے ان کے پاس سے بڑی مقدار میں مذہبی لٹریچر برآمد کرنے کا دعویٰ بھی کیا ہے۔

دویدی نے کہا، "حالیہ ہفتوں میں، اسی طرح کے دو کیس سدھولی اور ایک نگوہی میں پائے گئے، جہاں عیسائی مشنری سرگرمیوں سے منسلک لوگوں کو گرفتار کر کے جیل بھیج دیا گیا۔  انہوں نے مزید کہا کہ پہلے کی تحقیقات میں مختلف ٹرسٹوں کی جانب سے مالی مدد کے شواہد ملے تھے، حالانکہ اس معاملے کو مزید آگے نہیں بڑھایا گیا تھا۔

فنڈنگ ​​اور مبینہ وسیع نیٹ ورک کی تحقیقات کے لیے پولیس نے اب ایک خصوصی تحقیقاتی ٹیم (SIT) تشکیل دی ہے۔ دویدی نے کہا، "ایس آئی ٹی مالی امداد کے ذرائع کا جائزہ لے گی، ملزم کی سرگرمیوں کی نگرانی کرے گی، اور اس بات کا اندازہ لگائے گی کہ  ماضی میں کتنے لوگوں کا تبدیلی مذہب کرایا گیا ہے ۔ انہوں نے کہا کہ میں ہر ہفتے ذاتی طور پر اس کے کام کا جائزہ لوں گا۔

ایس آئی ٹی کی قیادت ایک سرکل آفیسر کرے گا اور اس میں اسپیشل آپریشنز گروپ (ایس او جی)، سرویلنس اور سائبر سیل کے افسران کے ساتھ ساتھ متعلقہ تھانوں کے تفتیشی افسران بھی شامل ہوں گے۔حکام نے تصدیق کی کہ ہرجیت اور سنیتا مسیح پر متعلقہ دفعات کے تحت مقدمہ درج کر کے جیل بھیج دیا گیا ہے۔