ہریدوار میں کلاس 1 کے مسلم لڑکے کی بے رحمی سے پٹائی،ہاتھ ٹوٹا

نئی دہلی ،14 ستبر :۔

اترا کھنڈ کے ہریدوار کے جھابریرا علاقے میں ایک سات سالہ مسلمان لڑکے کو اس کے اسکول کے پرنسپل اور ٹیچر نے صرف اس لئے بے رحمی سے پٹائی کی کہ اس نے ایک دن غیر حاضری کر دی تھی ۔اس بے رحمانہ پٹائی میں سات سالہ بچے کا ہاتھ ٹوٹ گیا ۔اہل خانہ نے شدید غم و غصہ کا اظہار کرتے ہوئے ملزمز اساتذہ کے خلاف سخت کارروائی کا مطالبہ کیا ہے

رپورٹ کے مطابق پرائمری اسکول عالم پور کے کلاس 1 کے طالب علم کو مبینہ طور پر پرنسپل رویندرا نے زمین پر پٹخ دیا،اور بچے کے چہرے پر اپنا پاؤں رکھ دیا   جب کہ استاد راکیش سینی نے اسے چھڑی سے اس بری طرح مارا کہ اس کا ہاتھ ٹوٹ گیا۔ اس کے والد نے شکایت درج کرائی ہے، اور لڑکے کی کمر حملہ کے نشانات اب بھی دکھائی دے رہے ہیں۔

شکایت میں مزید کہا گیا ہے کہ مار پیٹ کے بعد اساتذہ نے لڑکے کو دھمکی دیتے ہوئے کہا کہ جا، ورنہ ہم تمہیں جان سے مار دیں گے۔ خوفزدہ اور زخمی، بچے نے صدمے میں اسکول چھوڑ دیا۔

لواحقین نے دونوں اساتذہ کے خلاف قانون کی سنگین دفعات کے تحت سخت قانونی کارروائی کا مطالبہ کیا ہے۔ ان کا کہنا تھا کہ معطلی کافی نہیں ہوگی، ملزم کو ملازمت سے برخاست کیا جائے، فرد جرم عائد کی جائے اور مقدمہ چلایا جائے۔

اس واقعے نے ہریدوار پولیس، نیشنل کمیشن فار پروٹیکشن آف چائلڈ رائٹس (این سی پی سی آر) اور اقلیتوں کے قومی کمیشن (این سی ایم) کو مداخلت کرنے کی  اپیل کرتے ہوئے غم و غصہ کا اظہار کیا ہے ۔