گؤ کشی کے شبہ میں پھر ایک نوجوان کی ماب لنچنگ،پچاس ہزار تاوان کی وصولی کا الزام

دعوت ویب ڈیسک

نئی دہلی،24 ستمبر :۔

بی جے پی کی حکمرانی والی ریاستوں میں گؤ کشی کے شبہ میں نام نہاد گؤ رکشکوں کے ذریعہ مسلم نوجوانوں کے ساتھ ماب لنچنگ کے واقعات مسلسل سامنے آ رہے ہیں ۔ اب راجستھان کے بھیلواڑہ میں  مدھیہ پردیش کے مندسور ضلع سے تعلق رکھنے والے 35 سالہ آصف بابو ملتانی کو پیٹ پیٹ کر ہلاک کر دیاگیا۔ یہ واقعہ 15 اور 16 ستمبر کی درمیانی شب 3 بجے کے قریب اس وقت پیش آیا جب آصف اپنے کزن محسن کے ساتھ مویشی منڈی سے کھیتی باڑی اور گھریلو استعمال کے لیے مویشی خریدنے کے بعد واپس آ رہا تھا۔

پولیس کے مطابق آصف کے بھائی منجو پیملا نے 17 ستمبر کو بنیرہ پولیس اسٹیشن میں شکایت درج کرائی تھی۔ اس نے الزام لگایا کہ حملہ آوروں نے نہ صرف آصف کو مارا پیٹا بلکہ اس کے مال سے 36,000 روپے بھی چھین لیے اور اس کے موبائل فون سے اس کے گھر والوں کو کال کر کے 50,000 روپے تاوان کا مطالبہ کیا۔

میڈیا رپورٹوں کے مطابق  17 ستمبر کو بھیلواڑہ پولیس نے انہیں آصف کے اسپتال میں داخل ہونے کی اطلاع دی۔ انہوں نے کہا، "جب ہم پہنچے تو ڈاکٹروں نے انہیں پہلے ہی جے پور ریفر کر دیا تھا۔ وہیں 20 ستمبر کو انتقال  ہو گیا”۔ اس کے پورے جسم پر زخموں کے نشان تھے۔وہ کہتے ہیں، "میرے بھائی کا قصور صرف یہ تھا کہ وہ مسلمان تھا اور مویشی لے جا رہا تھا۔ گاڑی میں ایک بھی گائے نہیں تھی، صرف بیل اور بھینسیں تھیں۔

بھیلواڑہ کے ایس پی دھرمیندر سنگھ نے کہا کہ اب تک پانچ لوگوں کو گرفتار کیا گیا ہے اور بی این ایس کی دفعات کے تحت مقدمہ درج کیا گیا ہے، جس میں قتل کی کوشش،  جان بوجھ کر چوٹ پہنچانا، بھتہ خوری، غیر قانونی اجتماع اور غلط طریقے سے رکاوٹ ڈالنا شامل ہے۔ گائے کی اسمگلنگ کا ایک الگ مقدمہ بھی درج کیا گیا ہے۔

محسن نے الزام لگایا، "ایک کار نے ہمارا راستہ روکا، اور جیسے ہی پک اپ وین رکی، 14-15 لوگوں نے ہمیں گھیر لیا اور ہمیں وین سے باہر نکال دیا۔ کچھ سنے بغیر، انہوں نے ہمیں مارنا شروع کر دیا اور مویشیوں کی خریداری کی رسیدیں چھین لیں۔ وہ بار بار ہمیں ‘گائے اسمگلر’ کہہ کر مارتے رہے۔” آصف نے پسماندگان میں اہلیہ، ڈھائی سالہ بیٹی اور آٹھ ماہ کا بیٹا چھوڑا ہے۔ اہل خانہ کا کہنا ہے کہ ایف آئی آر میں نامزد ملزمان تاحال فرار ہیں۔