کیا عمر خالد اور شرجیل امام کو ضمانت نہ ملنے پر ملزمین کے وکلاء ذمہ دار ہیں؟

دعوت ویب ڈیسک

نئی دہلی ،03ستمبر :۔

گزشتہ پانچ برسوں سےجیل کی سلاخوں کے پیچھے موجود عمر خالد ،شرجیل امام اور دیگر سات ملزمین کو ایک پھر ہائی کورٹ نے ضمانت نہیں دی ۔مسلسل بغیر کی سماعت اور ضمانت کے طلبا لیڈروں کو جیل میں بند رکھنے پر سوال کھڑے کئے جا رہے ہیں ۔مگر کیا اس میں عدالتی کارروائی میں تعصب ہے یا ملزمین کے وکلا ہی کچھ ایسی  حرکتیں کر رہے ہیں اور بہتر طریقے سے عدالت کے سامنے موقف نہیں رکھ پانے کی وجہ سے انہیں ضمانت نہیں مل پا رہی ہے ؟

حالیہ دنو ں میں ہائی کورٹ سے ضمانت کی درخواست مسترد ہونے پر ایک بار پھر سپریم کورٹ کے سابق چیف جسٹس جسٹس ڈی وائی چندر چوڑ کا ایک ویڈیو سوشل میڈیا پر وائرل ہو رہا ہے۔ اس میں وہ عمر خالد کی درخواست ضمانت پر بات کر رہے ہیں۔ یہ سابق چیف جسٹس کے 13 فروری 2025 کو دیئے گئے انٹرویو کا ایک چھوٹا سا حصہ ہے، جس میں وہ دعویٰ کر رہے ہیں کہ عمر خالد کے وکیل نے عدالت کے سامنے سماعت ملتوی کرنے کا بار بار مطالبہ کیا ہے۔ چندر چوڑ نے عمر خالد کی درخواست ضمانت واپس لینے کے واقعہ کا بھی ذکر کیا اور کہا کہ ایسے وکلاء کے بارے میں کیا کہا جائے جو بار بار کیس کی سماعت ملتوی کرتے ہیں اور پھر کیس واپس لے لیتے ہیں۔

رپورٹ کے مطابق، سابق سی جے آئی نے اس معاملے میں ججوں پر سوال اٹھانے والے لوگوں کو مشورہ دیا کہ وہ کیس کا ریکارڈ چیک کریں۔ انہوں نے کہا کہ سوشل میڈیا پر ایک خاص نقطہ نظر پیش کیا جاتا ہے لیکن جج وہاں اپنا نقطہ نظر دفاع میں نہیں رکھ سکتے۔ چندر چوڑ کا یہ بیان ایسے وقت میں وائرل ہو رہا ہے جب دہلی ہائی کورٹ نے دہلی فسادات کے ملزموں بشمول خالد اور شرجیل امام کی ضمانت کی درخواست مسترد کر دی ہے۔

عمر خالد دہلی فسادات کا ملزم ہے اور 5 سال سے جیل میں ہے۔ حال ہی میں دہلی ہائی کورٹ نے ان کی ضمانت کی درخواست مسترد کر دی تھی۔ اس کے بعد سوشل میڈیا پر ایک بحث چھڑ گئی۔ کچھ لوگوں نے عدلیہ کی ‘غیر جانبداری’ پر سوال اٹھایا۔ اس سے قبل بھی سوشل میڈیا پر متعدد معروف ہستیوں نے عمر خالد کی ضمانت نہ ہونے پر سوالات اٹھاتے رہے ہیں ۔

سابق چیف جسٹس نے کہا تھا کہ میں کیس کی خوبیوں پر کوئی تبصرہ نہیں کرنا چاہتا لیکن ایک بات واضح طور پر بتا دوں جسے لوگ عمر خالد کے معاملے میں اکثر بھول جاتے ہیں۔ آپ اندازہ لگا سکتے ہیں کہ کم از کم سات بار عمر خالد کے وکیل نے سماعت کی تاریخ تبدیل کرنے کا مطالبہ کیا۔ اور بالآخر درخواست ضمانت واپس لے لی گئی۔

ان کا مزید کہنا تھا کہ ایسے وکیل کے بارے میں کیا کہا جا سکتا ہے جو بار بار کیس کی سماعت ملتوی کرتا ہے اور پھر بالآخر کیس واپس لے لیتا ہے۔ انہوں نے کہا کہ بار یا سول سوسائٹی کو بتایا جائے کہ وہ کیس کا ریکارڈ دیکھیں، جس میں وکیل بار بار وقت مانگتے رہے۔ کیس کی بحث میں اتنی ہچکچاہٹ کیوں؟

سابق سی جے آئی نے کہا، یا تو آپ پہلے دن بحث کریں یا آپ یہ کہیں کہ میں ضمانت کی درخواست پر اصرار نہیں کرنا چاہتا۔ کیس کے مطابق ہائی کورٹ یا ڈسٹرکٹ کورٹ میں ضمانت کے لیے اپنی درخواست محفوظ رکھوں گا تاہم عمر خالد کے کیس میں ریکارڈ ہی بتاتا ہے کہ عدالت میں بار بار التوا کی درخواستیں دائر کی گئیں۔

سابق جسٹس چندرچوڑ نے سوشل میڈیا پر کیس کے بارے میں بنائے گئے بیانیے پر سوال اٹھاتے ہوئے کہا کہ وہاں ایک خاص نظریہ پیش کیا جاتا ہے، جہاں ججوں کو اپنے دفاع کا کوئی موقع نہیں ملتا۔ عدالت میں جو کچھ ہوتا ہے اس کا تفصیلی ریکارڈ دیکھیں تو معلوم ہوتا ہے کہ حقیقت اس سے کہیں زیادہ پیچیدہ ہے۔انہوں نے خالد کے وکلاء سے کہا کہ وہ بار بار التواء کا مطالبہ کرنا بند کریں اور مقدمات پر بحث کے لیے تیار رہیں۔