نئی دہلی، اپریل 16: مرکز نے بدھ کے روز 170 اضلاع کو کورونا وائرس ہاٹ سپاٹس یا ’’ریڈ زون‘‘ علاقوں کے طور پر شناخت کیا، جن میں تمام چھ میٹرو اور سب سے بڑے شہر شامل ہیں۔ ان مقامات پر ملک میں 80 فیصد سے زیادہ واقعات سامنے آئے ہیں یا انفیکشن میں غیر معمولی اضافہ دیکھا گیا ہے۔
بدھ کے روز وزارت صحت نے ملک بھر کے اضلاع کو تین قسموں میں تقسیم کیا۔ ہاٹ سپاٹس، نان ہاٹ پاٹس اور گرین زون۔
حکومت کی طرف سے جاری کردہ اس فہرست میں 123 اضلاع کو ’’بڑے پھیلاؤ‘‘ کے طور پر نشان زد کیا گیا ہے- جس میں دہلی کے تمام نو اضلاع شامل ہیں۔ ممبئی، کولکاتا، بنگلورو اربن کے نو اضلاع، حیدرآباد، چنئی، جے پور اور آگرہ بھی ان علاقوں میں شامل ہیں جنھیں ہاٹ سپاٹس کے طور پر نشان زد کیا گیا ہے۔ تمام 6 میٹرو سٹیز دہلی، ممبئی، کولکاتا، چنئی، بنگلور اور حیدرآباد میں متاثرین کی تعداد بہت زیادہ ہے۔
اس فہرست میں تمل ناڈو 22 اضلاع کے ساتھ سب سے زیادہ ہاٹ سپاٹس والی ریاست ہے۔ اس کے بعد مہاراشٹر، راجستھان اور آندھرا پردیش میں 11-11 ایسے اضلاع نشان زد کیے گئے ہیں۔
حکومت نے کہا کہ 170 ہاٹ سپاٹس میں سے 47 میں کلسٹر پھیل گیا ہے لیکن ان میں کمیونٹی ٹرانسمیشن نہیں ہے۔
اس کے علاوہ 207 اضلاع کو، جہاں مقدمات کے دگنا ہونے کی شرح فی الحال کم ہے لیکن وہ ممکنہ ہاٹ اسپاٹ ہوسکتی ہیں، ’’نان ہاٹ سپاٹس‘‘ یا ’’وائٹ زون‘‘ کے طور پر درجہ بند کیا گیا ہے۔
ریاستوں سے کہا گیا ہے کہ وہ یہ یقینی بنائیں کہ تمام ہاٹ سپاٹس میں وبا کا پھیلاؤ ختم ہو۔ حکومت نے مزید کہا کہ اگر 28 دن کے اندر کوئی نیا معاملہ سامنے نہیں آیا اور تمام موجودہ مریض ٹھیک ہوگئے تو اس علاقے کو گرین زون قرار دیا جاسکتا ہے۔
بیان میں یہ بھی کہا گیا ہے کہ جانچ میں بھی ان لوگوں کو بھی شامل کیا جائے گا جنھیں انفلوئنزا جیسی بیماریوں اور سانس میں تکلیف کا سامنا ہے۔
آج صبح تک ملک بھر میں 12،380 کورونا وائرس کے معاملات کی تصدیق ہوئی ہے، جن میں سے 414 افراد فوت ہو گئے ہیں۔