کانوڑ یاترا کے روٹ پر ڈھابوں پر کام کرنے والے عملہ کے ساتھ بد سلوکی کی اویسی نے مذمت کی

نئی دہلی ،03 جولائی :۔

آل انڈیا مجلس اتحاد المسلمین (اے آئی ایم آئی ایم) کے صدر اسد الدین اویسی نے اتر پردیش کے مظفر نگر میں کانوڑ  یاترا کے راستے پر ڈھابہ کے کارکنوں کے ساتھ توہین آمیز سلوک کی سخت مذمت کی ہے۔ ان کا یہ تبصرہ ان خبروں کے منظر عام پر آنے کے بعد آیا ہے کہ سوامی یشویر مہاراج کی قیادت میں ہندوتوا گروپوں کے ذریعہ کارکنوں کو اپنا مذہب ثابت کرنے کے لیے کپڑے اتارنے پر مجبور کیا گیا تھا۔

"کیا یہ چوکس گروہ حکومت ہیں جو آدھار کارڈ مانگ رہے ہیں؟” اویسی نے 2 جولائی کو حیدرآباد میں نامہ نگاروں سے بات کرتے ہوئے پوچھا۔ "کسی سے اس کا مذہب کیسے چھینا جا سکتا ہے؟ یہ  ٹھیک نہیں ہے ، پولیس نے ابھی تک کسی کو گرفتار کیوں نہیں کیا؟”

اس واقعے میں مبینہ طور پر تقریباً 5,000 مرد ملوث تھے جو دہلی-دہرا دون ہائی وے پر ہوٹل اور ڈھابہ کے عملے سے شناختی ثبوت مانگ رہے تھے۔ کچھ معاملات میں، جب عملہ دستاویزات پیش کرنے میں ناکام رہا، تو ان کے کپڑے اتروائے گئے اور انہیں ہراساں کیاگیا۔

اویسی نے نشاندہی کی کہ علاقے میں ہوٹل نسلوں سے پرامن طور پر موجود تھے۔  یہ 10 سال پہلے کیوں نہیں ہوا؟ اب کیا بدل گیا ہے؟ اس وقت  کانوڑ یاترا امن کے ساتھ ہوتی تھی۔

ایک ایسے معاملے کا حوالہ دیتے ہوئے جس میں ایک ہندو عملے کو بھی زبردستی کپڑے اتارنے پر مجبور کیا گیا، اویسی نے پوچھا، "یہ لوگ کس حق سے ہوٹلوں میں داخل ہو کر دستاویزات مانگ رہے ہیں؟ انہیں یہ اختیار کس نے دیا؟” اویسی نے جوابدہی کا مطالبہ کیا: "یہ لوگ قانون سے بالاتر ہو کر کام کر رہے ہیں، قانون کی حکمرانی پر عمل ہونا چاہیے، یہی میرا مطالبہ ہے۔