وقف ترمیمی بل ہندوستان کی سب سے بڑی مذہبی اقلیت کے خلاف ایک جابرانہ اقدام ہے

نئی دہلی ،09 مارچ :۔

جماعت اسلامی ہند (جے آئی ایچ) کے امیر سید سعادت اللہ حسینی، جو آل انڈیا مسلم پرسنل لا بورڈ (اے آئی ایم پی ایل بی) کے  نائب صدر بھی ہیں، نے دہلی اور آس پاس کے علاقوں کے مسلمانوں سے 11 مارچ کو جنتر منتر پر وقف (ترمیمی) بل 2024 کے خلاف احتجاج میں بڑی تعداد میں شرکت کرنے کی اپیل کی ہے۔

خیال رہے کہ یہ احتجاج کئی غیر مسلم تنظیموں کے ساتھ مل کر اے آئی ایم پی ایل بی کے مجوزہ بل کے خلاف احتجاج کے لیے منعقد کیا جا رہا ہے جو ہندوستان کے آئینی قانون کی مکمل خلاف ورزی کرتا ہے اور وقف املاک کو تباہ کرنے کا ارادہ رکھتا ہے۔

AIMPLB ہندوستان میں اسلامی فکر کے تمام مکاتب فکر کی زیادہ تر مسلم مذہبی تنظیموں کی ایک امبریلا تنظیم ہے۔ حزب اختلاف کی جماعتوں کے دباؤ اور مسلمانوں کی زبردست دستخطی مہم کے تحت اس بل کو تقریباً سات ماہ قبل پارلیمانی کمیٹی کے پاس بھیجا گیا تھا۔

بحث کرنے اور مختلف اسٹیک ہولڈرز سے تجاویز طلب کرنے کے بعد، جے پی سی نے بل کو واپس لینے کی سفارش نہیں کی۔ اس کے بجائے، اس نے خطرناک دفعات پر مشتمل متنازعہ بل لوک سبھا کے اسپیکر کو پارلیمنٹ میں پاس کرانے کے لیے پیش کیا۔یہ بل اب کسی بھی وقت پارلیمنٹ میں پیش کیے جانے کا امکان ہے۔

جماعت اسلامی ہند کے امیر سد سعادت اللہ حسینی نے ایک ویڈیو پیغام میں کہا کہ   "مجوزہ بل مسلمانوں کو دیے گئے آئینی حقوق کی مکمل خلاف ورزی ہے،یہ ہندوستان کی سب سے بڑی مذہبی اقلیت کے خلاف ایک جابرانہ اقدام ہے۔

اس ویڈیو پیغام میں انہوں نے کہا کہ اگر مجوزہ بل قانون بن جاتا ہے تو مسلمان اپنی وقف املاک کے انتظام و انصرام کے حق سے محروم ہو جائیں گے، کیونکہ بل میں کی گئی ترامیم بہت نقصان دہ ہیں اور ان تمام دفعات کو ہٹانے کا ارادہ رکھتی ہیں جو وقف املاک کو تحفظ فراہم کرتی ہیں۔

امیر جماعت نے کہا کہ آئینی قانون نے نہ صرف مسلمانوں کو اپنی مذہبی جائیدادوں کے انتظام و انصرام کا حق دیا ہے بلکہ ملک کے تمام مذہبی گروہوں کو بھی دیا ہے۔

انہوں نے اپنے ویڈیو بیان میں کہا، ’’مرکزی حکومت صرف وقف قوانین میں ترمیم کرکے مسلمانوں کو ان کے حقوق سے محروم کرنا چاہتی ہے۔‘‘مجوزہ بل کی وجہ سے وقف املاک کا وجود خطرے میں ہے۔ حسینی نے کہا کہ گزشتہ ایک سال سے کمیونٹی کو بل کی خطرناک دفعات سے آگاہ کرنے کی کوششیں کی جا رہی ہیں۔ مسلم رہنماؤں اور ان کی تنظیموں نے ملک کے مختلف مقامات پر مشاورتی اجلاس منعقد کیے اور بل کے خلاف احتجاجی مظاہرے بھی کیے ۔

انہوں نے کہا، ”مسلمانوں نے اپنی انفرادی حیثیت میں، اے آئی ایم پی ایل بی اور جماعت اسلامی ہند جیسی تنظیموں نے مجوزہ بل پر اپنے اعتراضات پیش کیے، ساتھ ہی جے پی سی کے سوالات کے تفصیل سے جواب دیے۔

انہوں نے مزید کہا کہ  "حکومت کو بل واپس لینے کے لیے قائل کرنے کی ہر ممکن کوشش کی گئی، لیکن بدقسمتی سے حکومت نے تمام جمہوری عمل کو نظرانداز کر دیا ہے اور اب پارلیمنٹ میں بل کو منظور کرانے کی ہر ممکن کوشش کر رہی ہے۔”

حسینی نے کہا، "لہذا، اب مسلمانوں کے پاس اس بل کے خلاف بڑے پیمانے پر احتجاج کرنے کے علاوہ کوئی چارہ نہیں ہے۔

انہوں نے کہا کہ ’’میں سمجھتا ہوں کہ وقف املاک، مساجد اور مدارس کی حفاظت مسلمانوں کی مذہبی ذمہ داری ہے کیونکہ یہ اللہ تعالیٰ کی جائیدادیں ہیں اور مسلمان ان کے امین ہیں۔‘‘ انہوں نے اپنے پیغام میں واضح کیا کہ ’’ان کی حفاظت کرنا مسلمانوں کی ذمہ داری ہے۔

خیال رہے کہ اے آئی ایم پی ایل بی کے صدر مولانا خالد سیف اللہ رحمانی نے بھی اسی طرح کی اپیل جاری کی ہے۔ احتجاج میں شرکت کی اپیل کرنے والوں میں اے آئی ایم پی ایل بی کے جنرل سکریٹری مولانا فضل الرحمان مجددی، اے آئی ایم پی ایل بی کے ترجمان سید قاسم رسول الیاس، جمعیۃ علماء ہند کے قائدین مولانا سید ارشد مدنی اور مولانا محمود مدنی، اے آئی ایم پی ایل بی کے نائب صدر عبید اللہ خان اعظمی، مولانا اصغر امام مہدی سلفی اور مولانا محمد علی محسن تقی بھی شامل ہیں۔