وقف ترمیمی بل کے خلاف ملک بھر کے اہم شہروں  میں زبر دست احتجاج

نئی دہلی04 اپریل :۔

وقف ترمیمی بل کے پارلیمنٹ سے منظوری کے بعد ملک بھر میں مسلمانوں  میں غصہ پایا جا رہا ہے۔ آج جمعہ کی نماز کے دوران ملک بھر میں متعدد اہم شہروں میں مسلمانوں نے زبر دست احتجاج کیا اور سڑکوں پر نکل کر مظاہرے کئے۔

احمد آباد میں جمعہ کی نماز کے بعد بڑی تعداد میں لوگوں نے سڑکوں پر نکل کر بل کی مخالفت کی، جس کے بعد پولیس نے کارروائی کرتے ہوئے 50 سے زائد افراد کو حراست میں لے لیا۔ مظاہرے کے دوران ماحول کشیدہ رہا لیکن پولیس نے صورتحال قابو میں رکھی۔اس کے علاوہ دہلی اور اتر پردیش میں متعدد شہروں میں پولیس اور سیکورٹی الرٹ رہی اور کسی بھی طرح کے احتجاج اور مظاہروں کو مسدود رکھا۔

ادھر، مغربی بنگال کی راجدھانی کولکاتہ میں بھی وقف بل کے خلاف زبردست مظاہرہ ہوا۔ مظاہرین نے ’وقف بِل واپس لو‘ کے نعرے لگائے اور حکومت کے خلاف ناراضگی کا اظہار کیا۔ اسی طرح، جھارکھنڈ کی راجدھانی رانچی میں بھی مسلم برادری کے افراد نے بل میں ترمیم کے خلاف زبردست احتجاج کیا۔

رپورٹس کے مطابق، جمعہ کی نماز کے بعد رانچی کی ایکرا مسجد کے باہر مظاہرین نے ہاتھوں میں بینرز اٹھا کر اپنی مانگیں رکھیں۔ ان کا کہنا تھا کہ وقف بِل میں تبدیلی سے ان کے حقوق متاثر ہو رہے ہیں، جسے کسی صورت قبول نہیں کیا جائے گا۔

بہار میں احتجاج کے دوران نتیش کمار اور چندرابابو نائیڈ کو پتلا نذر آتش کرتے ہوئے

دریں اثنا بہار  میں بھی جمعہ کی نماز کے بعد احتجاج دیکھنے کو ملا ۔ جموئی ضلع کے رضا نگر غوثیہ مسجد کے باہر سینکڑوں مظاہرین نے احتجاج کیا۔ انہوں نے وزیر اعلیٰ نتیش کمار اور دیگر رہنماؤں کے خلاف نعرے بازی کی اور آئندہ انتخابات میں حکومت کو سبق سکھانے کی بات کہی۔

دوسری جانب، اتر پردیش میں پولیس ہائی الرٹ پر ہے۔ خاص طور پر لکھنؤ، سنبھل، بہرائچ، مرادآباد، مظفرنگر اور سہارنپور سمیت کئی حساس اضلاع میں سخت حفاظتی اقدامات کیے گئے ہیں۔ پولیس نے پرانے لکھنؤ کے حساس علاقوں میں اضافی نفری تعینات کی ہے اور ڈرون و سی سی ٹی وی کیمروں سے نگرانی کی جا رہی ہے۔

مہاراشٹر کے ناگپور میں بھی پولیس نے الرٹ جاری کرتے ہوئے عوام کو پرتشدد مواد سوشل میڈیا پر شیئر نہ کرنے کی ہدایت کی ہے۔ حکام نے خبردار کیا ہے کہ ایسی کسی بھی حرکت پر سخت قانونی کارروائی ہوگی۔

احمد آباد میں مظاہرین کو حراست میں لیتی پولیس

واضح رہے کہ اس سلسلے میں آل انڈیا مسلم پرسنل لا بورڈ نے پہلے ہی ملک گیر سطح پر احتجاج کرنے کا اعلان کیا تھا ۔اس سے قبل رمضان کے دوران جمعہ کی نماز میں کالی پٹی باندھ کر احتجاج کرنے اور اس بل کی مخالف کا اظہارملک بھر کی مساجد میں مسلمانوں نے کیا تھا۔