وقف ترمیمی بل کیخلاف لڑائی جمہوریت اور مذہبی آزادی کی لڑائی ہے

نئی دہلی،10 مارچ :۔

آل انڈیا مسلم پرسنل لا بورڈ (اے آئی ایم پی ایل بی) کی طرف سے 13 مارچ کو جنتر منتر پر زبردست احتجاج کے لیے دی گئی کال کی مکمل حمایت کرتے ہوئے، جماعت اسلامی ہند (جے آئی ایچ) کے نائب امیر پروفیسر۔ سلیم انجینئر نے بی جے پی زیرقیادت مرکزی حکومت پر زور دیا کہ وہ متنازعہ وقف بل کو واپس لے۔

انہوں نے موجودہ وقف قوانین کو مؤثر طریقے سے نافذ کرنے کی ضرورت پر زور دیا، اس طرح مسلم وراثت اور اداروں کے تحفظ کو یقینی بنایا جائے۔جے آئی ایچ ہیڈکوارٹر میں منعقدہ ایک پریس کانفرنس میں پروفیسر  سلیم نے زندگی کے تمام شعبوں سے تعلق رکھنے والے لوگوں سے اقلیتوں کے حقوق پر حملے کے خلاف اٹھ کھڑے ہونے اور بڑے پیمانے پر احتجاج میں شامل ہونے کی اپیل کی۔

انہوں نے کہا، ’’یہ صرف مسلمانوں کی لڑائی نہیں ہے، یہ ہندوستان کی تمام برادریوں سے تعلق رکھنے والے انصاف، جمہوریت اور مذہبی آزادی کی لڑائی ہے۔‘‘انہوں نے زور دے کر کہا کہ وقف بل اہم آئینی حقوق کی خلاف ورزی کرتا ہے، بشمول آرٹیکل 14، 25، 26 اور 29، جو مذہبی آزادی اور اقلیتی اداروں کا تحفظ کرتے ہیں۔

پروفیسر سلیم نے خبردار کیا کہ اگر اس بل کو غیر جمہوری طریقے سے منظور کیا گیا تو اس سے نہ صرف اقلیتوں میں بلکہ تمام برادریوں میں عدم تحفظ کا احساس پیدا ہوگا۔ انہوں نے اس بات پر بھی زور دیا کہ حکومت مسلم کمیونٹی کے تحفظات کو نظر انداز کرتے ہوئے اپنی پارلیمانی اکثریت کے زور پر بل کو منظور کرنے پر مجبور کر سکتی ہے۔

تاہم، انہوں نے کہا کہ جماعت اسلامی ہند،آل انڈیا مسلم پرسنل لا بورڈ اور دیگر مسلم تنظیموں کے ساتھ، تمام آئینی، قانونی اور جمہوری طریقوں سے اس کی مخالفت جاری رکھے گی جب تک کہ اسے واپس نہیں لیا جاتا۔