جونپور،نئی دہلی، 19 مئی:
ایک طرف وزیر اعظم ٹی وی انٹر ویو میں انتخابات کے دوران ہندو مسلم کرنے سے انکار کرتے ہیں وہیں دوسری طرف انتخابی ریلیوں میں جم پر مسلمانوں کو نشانہ بناتے ہیں اسی طرح وزیر داخلہ امت شاہ بھی اپنی انتخابی ریلیوں میں کھلے عام ہندو مسلم کرتے نظر آتے ہیں ۔ اتوار کو انہوں نے ایک بار پھر انتخابی ریلی میں خطاب کرتے ہوئے کہا کہ تیسری بار مودی کو وزیر اعظم بناو مسلم ریزرویشن ختم کر دیں گے۔
وزیر داخلہ اتوار کو مچھلی شہر لوک سبھا حلقہ کے مڑیاہوں میں بی پی سروج کے حق میں انتخابی ریلی سے خطاب کرنے آئے تھے، انہوں نے اپوزیشن پر شدید حملہ کیا۔ امت شاہ نے تقریباً 25 منٹ کی تقریر میں اپوزیشن پر حملہ جاری رکھا۔
امیت شاہ نے کہاکہ میں یقین دلاتا ہوں کہ جب تک بی جے پی کا ایک بھی ایم پی ہے، ہم ریزرویشن کو ہاتھ نہیں لگانے دیں گے۔ انہوں نے کہا کہ پرانی حکومتوں نے ریزرویشن میں کمی کا کام کیا۔ انہوں نے مسلمانوں کو پانچ فیصد ریزرویشن دیا ہے۔ مودی کو تیسری بار وزیر اعظم بنائیں، ہم مسلم ریزرویشن ختم کر کے ایس سی ،ایس ٹی ،او بی سی کو دیں گے۔
اس سے قبل امت شاہ نے کانگریس کو نشانہ بناتے ہوئےاسٹیج سے عوام سے پوچھا کہ بھائیو اور بہنو، یہ کشمیر ہمارا ہے یا نہیں، لیکن کھڑگے جی کہتے ہیں کہ یوپی اور راجستھان کے لوگوں کا کشمیر سے کیا لینا دینا۔ شاہ نے مزید کہا کہ کھڑگے جی، آپ کی عمر 80 سے تجاوز کر گئی ہے۔ آپ اس ملک کو نہیں جان سکے۔ یہاں کا ہر بچہ کشمیر کے لیے اپنی جان قربان کر سکتا ہے۔ جیسے ہی پی ایم مودی نے اپنا دوسرا دور اقتدار سنبھالا، انہوں نے کشمیر سے آرٹیکل 370 ہٹا دیا۔ اب لال چوک پر ترنگا جھنڈا نصب ہے۔ راہل بابا اورانڈی اتحاد کا کہنا ہے کہ اگر ہم حکومت میں آتے ہیں تو ہم کشمیر میں دفعہ 370 کو دوبارہ بحال کریں گے۔
پہلے یہی لوگ کہتے تھے کہ آرٹیکل 370 کو ڈسٹرب کرو گے تو خون کی ندیاں بہیں گی۔ راہل بابا، پانچ سال گزر گئے اور ایک پتھر بھی پھینکنےکی ہمت نہیں ہوئی۔ یہ مودی کی حکومت ہے۔
امت شاہ نے کہا، ‘میں راہل بابا اور اکھلیش یادو سے پوچھنا چاہتا ہوں کہ آپ کی حکومت نے 10 سالوں میں اتر پردیش کو کیا دیا؟’ شاہ نے کہا- ‘میں بھی ایک تاجر کا بیٹا ہوں، میں پورا حساب لے کر آیا ہوں۔ ان لوگوں نے 10 سال تک اتر پردیش کو چار لاکھ نوے ہزار کروڑ روپے دیے تھے۔ وہیں مودی نے 19 لاکھ 11 ہزار کروڑ روپے دیے ہیں۔ اس رقم سے اتر پردیش میں میٹرو سروس اور کئی صنعتیں لگائی گئیں۔ امت شاہ یہیں نہیں رکے، انہوں نے کہا کہ وہ اس لیے نہیں آئے کہ ان کا ووٹ بینک یہ دراندازوں کی وجہ سے نہیں آئے۔ ہم نے تین طلاق کو ختم کیا۔ ہم سی اے اے لائے ہیں۔ یہ ہندو پناہ گزینوں کو شہریت دینا ہے۔ انہوں نے کہا کہ کانگریس پارٹی یہ جھوٹ پھیلا رہی ہے کہ اگر اس بار مودی آئے تو وہ ریزرویشن ختم کر دیں گے۔ کیا ہم نے پچھلے 10 سالوں میں ایسا کیا ہے؟