نجیب کے ملنے اور انصاف کی فراہمی تک جدوجہد جاری رہے گی

نئی دہلی ،22 اگست :۔

جے این یو کا طالب علم نجیب احمد 2016 سے ہاسٹل سے لاپتہ ہے ۔اس کی تلاش کی تمام کوششیں اب تک ناکام رہی ہیں ۔ حالیہ دنوں میں سی بی آئی نے بھی ہاتھ کھڑے کرتے ہوئے نجیب احمد کی گمشدگی معاملے پر کلوزر رپورٹ پیش کر دی ہے ۔معاملہ بھلے ہی بند ہو گیا ہے لیکن جواہر لال نہرو یونیورسٹی اسٹوڈنٹس یونین (جے این یو ایس یو)  کی لاپتہ طالب علم نجیب احمد کی تلاش اور انصاف کیلئے جدو جہد جاری رکھنے کا اعلان کیا ہے ۔ یونین نے گزشتہ روز بدھ کو کانسٹی ٹیوشن کلب آف انڈیا میں ایک جلسہ عام کا اہتمام کیا۔اس جلسہ عام میں متعدد رہنماؤں نے خطاب کیا ۔اس موقع پر نجیب احمد کی ماں بھی موجود تھیں۔خیال رہے کہ نجیب احمد اکتوبر 2016 میں اے بی وی پی کے ارکان کے ساتھ مار پیٹ کے بعد سے لا پتہ ہے ۔

جلسہ عام  کا افتتاح جے این یو ایس یو کے صدر نتیش کمار نے کیا۔ انہوں نے کہا کہ نو سال گزرنے کے بعد بھی نہ تو دہلی پولیس اور نہ ہی سی بی آئی نے کوئی انصاف فراہم کیا ہے۔ انہوں نے کیس کی کارروائی بند کرنے کی حالیہ کوشش کو انصاف سے انکار قرار دیا اور کہا کہ جب تک احتساب نہیں ہو جاتا احتجاج جاری رہے گا۔

اس موقع پر راجیہ سبھا کے ممبران پارلیمنٹ منوج جھا اور وی سیواداسن، انڈین یونین مسلم لیگ کے احمد سجو، انسانی حقوق کے کارکن ندیم احمد اور سی پی آئی (ایم ایل) لبریشن لیڈر این سائی بالاجی موجود تھے۔

جے این یو طلبہ یونین کے صدر سرجیت مجومدار نے بھی اجتماع سے خطاب کیا اور نجیب کو انصاف دلانے کے لیے علمی دنیا کے عزم کا اعادہ کیا۔

اس اجتماع کا سب سے جذباتی لمحہ وہ تھا جب نجیب کی والدہ فاطمہ نفیس نے اپنے تجربات شیئر کیے۔ انہوں نے کہا کہ حکومت اور ایجنسیوں کی خاموشی کے باوجود وہ گزشتہ آٹھ سالوں سے اپنے بیٹے کی تلاش اور انصاف کے حصول کے لیے جدوجہد کر رہی ہیں۔ ان کی ہمت نے طلبہ کی تحریک کو مسلسل تقویت دی ہے۔

پروگرام کا اختتام جے این یو اسٹوڈنٹس یونین کی جنرل سکریٹری منتہا فاطمہ نے کیا۔ انہوں نے کہا کہ یہ لڑائی صرف نجیب کے لئے نہیں ہے بلکہ ان تمام اقلیتی اور مسلم طلباء کے لئے ہے جنہیں یونیورسٹیوں اور معاشرے میں امتیازی سلوک کا سامنا ہے۔ انہوں نے یقین ظاہر کیا کہ تحریک مزید مضبوطی اور عزم کے ساتھ آگے بڑھے گی۔

جے این یو اسٹوڈنٹس یونین نے اعلان کیا کہ وہ اس کیس کو عدالت میں آگے بڑھائیں گے اور تحریک کو تیز کریں گے۔ طلبہ یونین نے واضح کیا کہ نجیب کے ملنے اور انصاف کے حصول تک یہ جدوجہد جاری رہے گی۔