نئی دہلی ریلوے اسٹیشن کے پلیٹ فارم  پر موجودقدیم مساجد کے خلاف مقدمہ دائر

نئی دہلی،08اگست :۔

ملک کی راجدھانی دہلی میں موجود تاریخی مساجد کے خلاف ہندو شدت پسندتنظیموں نے مورچہ کھول دیا ہے۔مرکز میں مودی حکومت کے بعد انہیں شہ مل گئی ہے جس کی وجہ سے  تمام قدیم و جدید  مساجد کو بے بنیاد دعوے کر کے منہدم کرنے کا مطالبہ کر رہے ہیں ۔آئے دن کسی نہ کسی مسجد کے خلاف مقدمات دائر کر کے ہنگامہ کھڑا کر رہے ہیں ۔ایک بار پھر شدت پسندوں کے نشانے پر نئی دہلی ریلوے اسٹیشن پر موجود قدیم مساجد ہیں ۔سیو انڈیا فاؤنڈیشن نامی شدت پسند ہندو تنظیم نے ان دونوں قدیم مساجد کو غیر قانونی قرار دے کر ہٹانے کامطالبہ کیا ہے اور اس سلسلے میں دہلی ہائی کورٹ میں مقدمہ بھی دائر کر دیا ہے۔

رپورٹ کے مطابق  دہلی ہائی کورٹ نے پہاڑ گنج میں ڈویژنل ریلوے منیجر کے دفتر کے قریب مسجد غریب شاہ اور نئی دہلی ریلوے اسٹیشن پر پلیٹ فارم 2 اور 3 کے درمیان واقع ایک اور مسجد سے متعلق کیس کی اگلی سماعت 2 دسمبر 2024 کو مقرر کی ہے۔ خیال رہے کہ یہ دونوں مساجد نئی دہلی ریلوے اسٹیشن سے پہلے کی ہیں۔

انڈیا ٹو مارو کی رپورٹ کے مطابق عدالت نے نئی تاریخ سیو انڈیا فاؤنڈیشن (regd) کی طرف سے دائر کی گئی ایک پٹیشن کے جواب میں مقرر کی، جو ایک بنیاد پرست ہندو تنظیم ہے جس کا دعویٰ ہے کہ اس نے دہلی میں چار درجن سے زائد مساجد کو ہٹانے کے لیے قانونی کارروائی شروع کی ہے ۔

اگرچہ دونوں مساجد کا انتظام دہلی وقف بورڈ   کے زیر انتظام ہے، فاؤنڈیشن نے ریل لینڈ ڈیولپمنٹ اتھارٹی، وزارت ریلوے، اور ڈویژنل ریلوے مینیجر (نئی دہلی ریلوے اسٹیشن) کو جواب دہندگان کے طور پر نامزد کیا ہے، حالانکہ ان اداروں میں سے کوئی بھی مساجد کا مالک نہیں ہے۔ یا وہ زمین جس پر وہ  مساجد تعمیر ہیں۔ وقف کے امور کی دیکھ بھال کرنے والے جماعت اسلامی ہند کے اسسٹنٹ سکریٹری انعام الرحمن خان نے کہا کہ یہ درخواست گزاروں کی طرف سے مسجد کے املاک کے ٹرسٹیوں کو اندھیرے میں رکھنے اور ریلوے حکام کو جائیدادوں کا مالک بنا کر عدالت سے ہٹانے کا حکم حاصل کرنے کی چال ہے۔

اس سلسلے میں  دہلی وقف بورڈ کے قانونی نمائندوں نے فاؤنڈیشن کی شکایات کی مخالفت کرتے ہوئے درخواستیں دائر کیں، اور اس بات پر زور دیا کہ فاؤنڈیشن کے پاس ایسے کیسز لانے کے لیے قانونی حیثیت  نہیں ہے۔ مزید برآں، ریلوے حکام کو قانونی چارہ جوئی کا فریق نہیں بننا چاہیے، کیونکہ مساجد اور جس زمین پر ان کا قبضہ ہے وہ وزارت ریلوے کی نہیں ہے۔

دوسری جانب فاؤنڈیشن کا استدلال ہے کہ دونوں مساجد ریلوے کی زمین پر غیر قانونی طور پر تعمیر کی گئی تھیں اور انہیں ہٹا دیا جانا چاہیے۔ تاہم، دہلی وقف بورڈ کا کہنا ہے کہ مساجد رجسٹرڈ وقف جائیدادیں ہیں، اور تقریباً 300 سال پرانی ہیں، جو نئی دہلی ریلوے اسٹیشن کے قیام سے بہت پہلے سے موجود  ہیں۔

واضح رہے کہ سیو  انڈیا فاؤنڈیشن نامی بنیاد پرست ہندو تنظیم ہے ،جو گزشتہ کچھ برسوں سے راجدھانی دہلی میں واقع مساجد کے خلاف سر گرم ہے۔گزشتہ ماہ دہلی میں دو مساجد کے خلاف جو قانونی کارروائی عمل میں لائی گئی اس میں بھی اسی تنظیم کی کارستانی تھی ۔پریت سنگھ نامی فاؤنڈیشن سے سرکردہ رکن نے اپنے سوشل میڈیا ایکس پرعویٰ کیا  ہے کہ اس نے دہلی کے مختلف مقامات پر مبینہ طور پر غیر قانونی طور پر تعمیر کی گئی 54 مساجد کو ہٹانے کے لیے قانونی کارروائیاں شروع کی ہیں۔ ان میں دہلی ریلوے اسٹیشن کی دو مساجد، جہانگیر پوری ڈی بلاک مسجد، شالیمار باغ میں مسجد نور الٰہی، نیو سیما پوری میں نثاریہ مسجد، جامع مسجد (اوکھلا پھل اور سبزی منڈی کے قریب)، شاہدرہ ریلوے اسٹیشن کی مسجد، اندرلوک مسجد، اور سیلم پور میں پانی کے نالے  پر مسجد شامل ہیں۔ اس نے حالیہ دنوں میں  ایک نئی پوسٹ کے ذریعے  دہلی کی 30 دیگر مساجد کے خلاف مقدمات درج کرنے کا عہدکا اعلان کیا ہے۔