میزورم میں ریاستی حکومت کا انوکھا  قانون،بھیک مانگنے پر پابندی عائد  

نئی دہلی ،28 اگست :۔

میزورم کی قانون ساز اسمبلی نے ریاست میں ایک انوکھا قانون پاس کیا ہے جس کے تحت ریاست میں بھیک مانگنے پر پابندی عائد کر دی ہے ۔میزورم پروہیبیشن آف بیگری بل2025 کو کابینہ میں گزشتہ کل بدھ کو منظور ی دی ہے۔ اس بل کا مقصد ریاست میں بھیک مانگنے پر پابندی لگانا اور ساتھ ہی متاثرین کی بحالی کو یقینی بنانا ہے۔

وزیر اعلیٰ سمیت 13اراکین کی طویل غور و خوض کے بعد، اسمبلی نے بل منظور کر لیا جس سے |ریاست میں بھیک مانگنے پر سخت ضابطے کے ساتھ ساتھ منظم بحالی کے پروگراموں کی راہ ہموار ہوئی۔ یہ بل سماجی بہبود کی وزیر لال رینپوئی نے پیش کیا جنہوں نے زور دیا کہ اس کا مقصد صرف بھیک مانگنے پر روک لگانا نہیں بلکہ بھکاریوں کو روزی روٹی کے پائیدار مواقع بھی فراہم کرنا ہے۔

لال رینپوئی نے کہا کہ میزورم میں مضبوط سماجی ڈھانچے، گرجا گھروں کی شمولیت، غیر سرکاری تنظیموں اور موجودہ فلاح و بہبود کی اسکیموں کی وجہ سے روایتی طور پر بہت کم بھکاری ہیں۔ تاہم، انہوں نے خدشہ ظاہر کیا کہ وزیر اعظم نریندر مودی کے ذریعے 13 ستمبر کو سائیرنگ-سیہموئی ریلوے ہیڈ کے آئندہ افتتاح کے ساتھ بھکاریوں کی تعداد میں اضافہ ہوسکتا ہے۔ انہوں نے کہا کہ نئی ریلوے لائن ممکنہ طور پر ریاست سے باہر کے بھکاریوں کی آمد کا باعث بن سکتی ہے۔

اس مسئلے سے نمٹنے کیلئے، حکومت قانون کے نفاذ کی نگرانی کیلئے ایک ریاستی سطح کا ریلیف بورڈ قائم کرے گی۔ یہ بورڈ ریسیوِنگ سینٹرز قائم کرے گا جہاں بھکاریوں کو عارضی طور پر رکھا جائے گا، جس کے بعد 24گھنٹوں کے اندر انہیں ان کے آبائی شہروں یا ریاستوں میں واپس بھیج دیا جائے گا۔ محکمہ سماجی بہبود کے حالیہ سروے کے مطابق، دارالحکومت آئزول میں پہلے ہی غیر مقامی افراد سمیت 30 سے زیادہ بھکاری موجود ہیں۔

رپورٹ کے مطابق  دریں اثنا  حکومت کے اس اقدام کو اپوزیشن کے اراکین نے تنقید کا نشانہ بنایا ہے ۔ ان کی دلیل  ہے کہ یہ بل عیسائی اقدار سے مطابقت نہیں رکھتا اور میزورم کی ساکھ کو خراب کر سکتا ہے۔ انہوں نے مشورہ دیا کہ بھیک مانگنے کے مسئلے کو قانون سازی کی ممانعت کے بجائے کمیونٹی پر مبنی مداخلتوں کے ذریعے بہتر طریقے سے حل کیا جا سکتا ہے۔