مہاراشٹر: ہندوتوا تنظیموں کی دھمکیوں کے بعدگائے ذبیحہ کیس میں تین مسلم نوجوان گرفتار

نئی دہلی ،07 ستمبر :۔

مہاراشٹر کے جالنا ضلع میں مبینہ گؤ کشی کا ایک ویڈیو وائرل ہوا جس کے بعد علاقے میں کشیدگی پھیل گئی ۔ دائیں بازو کی جماعت کے شدت پسندوں نے فوری طور پر حرکت کرتے ہوئے پولیس سے اس کی شکایت کی اور دھمکی بھی دی جس کے بعد اتوار کو پولیس نے مبینہ طور پر گائے کے ذبیحہ کی ویڈیو کے  معاملے میں  تین افراد کو گرفتار کیا ہے۔

پولیس سپرنٹنڈنٹ اجے کمار بنسل نے تصدیق کی کہ مرکزی ملزم اسلم قریشی سمیت سفیان قریشی اور یاسین قریشی کو حراست میں لے لیا گیا ہے۔ مہاراشٹرا اینیمل پرزرویشن ایکٹ کے تحت اور مذہبی جذبات کو مشتعل کرنے کا مقدمہ درج کیا گیا ہے۔

یہ تنازع یکم ستمبر کو شروع ہوا، جب مبینہ ذبح کی ایک ویڈیو وائرل ہوئی، جس سے دائیں بازو کے گروپوں کی جانب سے غم و غصہ اور دھمکیاں موصول ہوئیں۔ کچھ گروپوں نے یہاں تک انتباہ دیا کہ جب تک گرفتاریاں نہیں کی جاتیں وہ گنیش کی مورتی وسرجن کی اجازت نہیں دیں گے۔

ایس پی بنسل نے نامہ نگاروں کو بتایا، "یہ ہمارے لیے ایک بڑا چیلنج تھا، کیونکہ فوری طور پر کام کرنے کے لیے کوئی جادوئی چھڑی نہیں ہے۔ تاہم، ہم نے چار ٹیمیں تشکیل دیں اور انھیں مختلف مقامات پر بھیج دیا، جن میں خلد آباد، پربھنی اور حیدرآباد شامل ہیں ۔

پولیس نے کہا کہ گرفتاریوں نے صورتحال پر قابو پالیا، اور گنیش مورتی وسرجن بعد میں پرامن طریقے سے انجام پایا ۔ حکام نے اس بات کی بھی تصدیق کی کہ ملزم کے خلاف انفارمیشن ٹیکنالوجی ایکٹ اور مہاراشٹر کنٹرول آف آرگنائزڈ کرائم ایکٹ (MCOCA) کے تحت مزید الزامات لگائے جائیں گے۔