مہاراشٹر میں نام نہاد گؤ رکشکو ں کی غنڈہ گردی کی وجہ سے مویشیوں کی تجارت بند، دیہی معیشت تباہ

دعوت ویب ڈیسک

نئی دہلی ،اورنگ آباد ، 6 اگست :۔

مہاراشٹر میں مویشیوں کی تجارت کی معطلی کو ایک ماہ مکمل ہونے کے بعد آل انڈیا جمعیۃ القریش نے نائب وزیر اعلیٰ اجیت پوار سے اس سنگین بحران میں فوری مداخلت کی اپیل کی ہے۔ بدھ کے روز تنظیم نے سات نکاتی میمورنڈم پیش کرتے ہوئے مویشیوں کی ترسیل، فروخت اور ذبیحہ سے وابستہ لاکھوں افراد کے روزگار پر پڑنے والے منفی اثرات کی تفصیل پیش کی۔

جنرل سکریٹری ایڈوکیٹ عبدالمجید قریشی اور ریاستی صدر محمد جاوید قریشی نے اس بات پر زور دیا کہ ان کی برادری مہاراشٹر اینیمل پرزرویشن ایکٹ 1976 کی مکمل پابندی کرتی ہے، مگر 1995 کی ترامیم، جن پر 2015 میں عمل درآمد شروع ہوا، نے غیر پیداوار مویشیوں کے تصرف میں بڑی رکاوٹیں کھڑی کر دی ہیں۔ یادداشت میں ان غیر سرکاری عناصر کی نشاندہی بھی کی گئی جو خود کو گائے کا محافظ ظاہر کر کے مویشیوں کو ضبط کرتے، پولیس کو جھوٹے الزامات دیتے اور تجارتی سرگرمیوں میں مداخلت کر کے آئینی و سماجی امن کو نقصان پہنچاتے ہیں۔ جمعیت نے ایسے گروہوں کے خلاف سخت مجرمانہ کارروائی کا مطالبہ کرتے ہوئے پولیس سے آزادانہ اور منصفانہ اقدامات کی اپیل کی ہے۔

اس بندش کے سبب دیہی معیشت شدید متاثر ہوئی ہے، لاکھوں کسان، قصاب، ٹرانسپورٹر اور دیگر مزدور طبقے بیروزگار ہو گئے ہیں، جبکہ چمڑے، کولڈ اسٹوریج اور ٹرانسپورٹ جیسے متعلقہ شعبے بھی دباؤ میں ہیں۔جانوروں کی ترسیل کے راستے بند ہونے سے نہ صرف کسان پریشان ہیں بلکہ خوراک کی قیمتوں میں اضافہ، بلیک مارکیٹ کی وسعت اور بین ریاستی رسد کے نظام میں خلل جیسے سنگین خطرات پیدا ہو گئے ہیں۔

یادداشت میں حکومت سے مطالبہ کیا گیا ہے کہ ایک ریاستی سطح کی لائیو اسٹاک ٹریڈ مانیٹرنگ کمیٹی قائم کی جائے، جس میں متعلقہ اداروں، قانونی ماہرین، کسان نمائندوں اور برادری کے قائدین کو شامل کیا جائے تاکہ شفاف اور قانون کے دائرے میں رہتے ہوئے تجارت کو بحال کیا جا سکے۔ آخر میں کہا گیا ہے کہ "ہم کوئی مراعات نہیں چاہتے، صرف اپنے قانونی حق کا تحفظ چاہتے ہیں۔” یہ اقدام ریاست میں ہم آہنگی اور اقتصادی استحکام کو فروغ دے گا۔