منی پور میں وائرل ویڈیو پر سپریم کورٹ برہم ،  قصورواروں کے خلاف سخت کارروائی کا حکم

نئی دہلی ،20جولائی :۔

منی پور سے گزشتہ دنوں وائرل ہونے والا ویڈیو کسی بھی مہذب سماج اور معاشرے کے لئے انتہائی شرمناک اور تکلیف دہ ہے ۔پوری دنیا میں ہندوستان کے لئے باعث شرم ہے ۔چیف جسٹس آف انڈیا نے   منی پور میں دو خواتین کے عریاں ویڈیو پر تشویش کا اظہار کیا ہے۔ سپریم کورٹ نے مرکز سے کہا کہ ویڈیو دیکھ کر ہم بہت پریشان ہیں۔ ذمہ داروں کے خلاف سخت کارروائی کی جائے۔ سپریم کورٹ نے اس معاملے کا ازخود نوٹس لیا۔ مرکز سے جواب مانگا گیا ہے۔ مرکز اور منی پور سے پوچھا ہے کہ اس معاملے میں کیا قدم اٹھایا گیا ہے۔ سی جے آئی نے کہا کہ جمہوریت میں یہ قابل قبول نہیں ہے۔ اس معاملے میں آئندہ جمعہ کو سماعت ہوگی۔ سی جے آئی نے کہا کہ ایک جمہوری ملک میں اس طرح کے واقعات کو برداشت نہیں کیا جا سکتا۔ خواتین کے حقوق کے حوالے سے اس قسم کا واقعہ روح کو ہلا دینے والا ہے۔ یہ آئین کے حقوق کی خلاف ورزی ہے۔

چیف جسٹس آف انڈیا  نے کہا کہ عدالت منی پور میں ایک خاتون پر جنسی ہراسانی اور تشدد کے حوالے سے کل منظر عام پر آنے والے ویڈیو سے بہت پریشان ہے۔ میڈیا میں ظاہر ہونے والے  تشدد اور انسانی حقوق کی سنگین خلاف ورزیوں کی نشاندہی کرتے ہیں۔ ایسے ماحول میں خواتین کو تشدد کے ہتھیار کے طور پر استعمال کرنا ناقابل قبول ہے۔ ہمارا موقف ہے کہ ملزمان کی گرفتاری کے لیے کیے گئے اقدامات سے عدالت کو آگاہ کیا جائے۔ ریاستی اور مرکزی حکومت کی طرف سے اٹھائے گئے اقدامات کے بارے میں عدالت کو آگاہ کریں۔ اس کے علاوہ، اس بات کو یقینی بنائیں کہ مستقبل میں ایسا نہ ہو۔

ایس جی مہتا نے سی جے آئی کی تشویش کو شیئر کرتے ہوئے کہا، "حکومت بھی اس واقعہ پر بہت فکر مند ہے۔ اس طرح کے واقعات مکمل طور پر ناقابل قبول ہیں۔ انہوں نے کہا کہ ویڈیو کے منظر عام پر آنے کے بعد حکومت نے مجرموں کو جلد ہی پکڑنے کے لیے سنجیدہ اقدامات کیے ہیں اور عدالت کو مطلع کیا جائے گا۔” کیس کی اگلی سماعت 28 جولائی کو ہوگی۔

واضح رہے کہ گزشتہ 74 دنوں سے منی پور میں تشدد کا سلسلہ جاری ہے  اور وزیر اعظم نریندر مودی کی خاموشی پر اپوزیشن کی جانب سے مسلسل سوالات اٹھائے جا رہے ہیں ۔اس اندوہناک واقعہ کے بعد وزیر اعظم نے بھی بیان جاری کر کے قصور واروں کے خلاف سخت کارروائی کا اشارہ دیا ہے ۔وزیر اعظم نریندر مودی نے کہا کہ منی پور میں جو کچھ ہوا ہے وہ انتہائی شرمناک ہے۔ یہ پورے ملک کو شرمندہ کرنے کے مترادف ہے۔ پی ایم مودی نے کہا کہ میں تمام وزرائے اعلیٰ سے کہنا چاہتا ہوں کہ وہ اپنی ریاست کی ماؤں اور بیٹیوں کی حفاظت اور امن و امان کو مضبوط بنانے کے لیے ہمیشہ چوکس رہے ہیں۔ اس واقعہ کے بارے میں، میں آپ کو یقین دلاتا ہوں کہ منی پور کے واقعہ میں قصورواروں کو سخت ترین سزا ملے گی۔ منی پور میں خواتین کے ساتھ جو ہوا وہ کسی بھی مہذب معاشرے کے لیے درست نہیں ہے۔