ملک میں آج سے تین نئے قوانین کا نفاذ

ماب لنچنگ کے کیس میں عمر قیدیا سزائےموت تک کی تجویز،غداری قوانین میں بھی تبدیلی

تاریخ اشاعت - 1 جولائی، 2024

نئی دہلی، یکم جولائی:۔

ملک میں اتوار کی رات جیسے ہی گھڑی کی بڑی اور چھوٹی سوئی ٹھیک 12 پر پہنچی، یکم جولائی کی تاریخ نے تعزیرات ہند میں ایک نئی تاریخ رقم کر دی۔ آج سے آئی پی سی، سی آر پی سی اور انڈین ایویڈینس ایکٹ کی جگہ تین نئے قوانین یعنی بھارتی نیائے سنہیتا،ناگرک سرکشا سنہیتا اور بھارتی ساکشیہ ادھینیم ملک میں نافذ ہو گئے ہیں۔ تین نئے قوانین میں فوری انصاف کو یقینی بنانے کے لیے ایف آئی آر سے فیصلے تک وقت کی حد مقرر کی گئی ہے۔

یہی نہیں، فوجداری مقدمات کی رفتار کو تیز کرنے کے لیے نئے قانون میں 35 مقامات پر ٹائم لائنز کا اضافہ کیا گیا ہے۔ شکایت موصول ہونے کے بعد ایف آئی آر درج کرنے، تفتیش مکمل کرنے، عدالت سے نوٹس لینے، دستاویزات داخل کرنے اور مقدمے کی سماعت مکمل ہونے کے بعد فیصلہ دینے کے لیے ایک مقررہ وقت ہے۔ اس کے ساتھ ہی حکومت کا دعویٰ ہے کہ جدید ٹیکنالوجی سے بھرپور استفادہ اور الیکٹرانک شواہد کو قانون کا حصہ بنا کر مقدمات کے جلد نمٹانے کا راستہ آسان کر دیا گیا ہے۔ شکایت، سمن اور گواہی کے عمل میں الیکٹرانک ذرائع کے استعمال سے انصاف میں تیزی آئے گی۔

اب تین دن میں ایف آئی آر

نئے قانون میں مقررہ وقت میں ایف آئی آر درج کرنے اور اسے عدالت تک پہچانے کو یقینی بنایا گیا ہے۔ بھارتی ناگرک سرکشا سنہیتا (بی این ایس ایس) میں ایک شق ہے کہ شکایت موصول ہونے کے بعد تین دن کے اندر ایف آئی آر درج کرنی ہوگی۔ تین سے سات سال کی سزا کے معاملوں میں 14 دن میں ابتدائی تفتیش مکمل کرنے کے بعد ایف آئی آر درج کی جائے گی۔ 24 گھنٹے میں تلاشی رپورٹ پیش کرنے کے بعد اسے عدالت میں پیش کیا جائے گا۔

چارج شیٹ کی ٹائم لائن بھی طے

ریپ کیس میں متاثرہ کی میڈیکل رپورٹ سات دن کے اندر پولیس اسٹیشن اور عدالت کو بھیجی جائے گی۔ پہلے سی آر پی سی میں کوئی وقت کی حد مقرر نہیں تھی۔ نیا قانون آنے کے بعد وقت میں پہلی کٹوتی یہیں سے ہوگی۔ نئے قانون میں چارج شیٹ کی ٹائم لائن بھی طے کی گئی ہے۔چارج شیٹ داخل کرنے کے لیے پہلے کی طرح 60 اور 90 دن کی مدت مقرر تو ہے، لیکن 90 دن کے بعد تفتیش جاری رکھنے کے لیے عدالت سے اجازت لینی پڑے گی اور تفتیش کو 180 دن سے زیادہ التوا میں نہیں رکھا جا سکتا۔ چارج شیٹ 180 دنوں کے اندر داخل کرنا ہوگی۔ ایسے میں چارج شیٹ کو جاری تحقیقات کے نام پر غیر معینہ مدت تک التوا میں نہیں رکھا جا سکتا۔

عدالت کے لیے بھی وقت کی حد مقرر

عدالت کے لیے وقت کی حد بھی مقرر کی گئی ہے۔ مجسٹریٹ 14 دن میں کیس کا نوٹس لیں گے۔ اس بات کو یقینی بنانے کے لیے بہت سے اقدامات کیے گئے ہیں کہ مقدمہ زیادہ سے زیادہ 120 دنوں میں زیر سماعت آجائے۔ پلی بارگیننگ کا وقت بھی مقرر ہے۔ پلی بارگیننگ کے نئے قانون میں کہا گیا ہے کہ اگر ملزم فرد جرم عائد کرنے کے 30 دن کے اندر اعتراف جرم کر لیتا ہے تو سزا میں کمی کر دی جائے گی۔ مقدمے کی سماعت مکمل ہونے کے بعد، عدالت کو 30 دنوں کے اندر اپنا فیصلہ سنانا ہوگا، فی الحال سی آر پی سی میں پلی بارگیننگ کے لیے کوئی وقت کی حد نہیں تھی۔ نئے قانون میں کیس میں دستاویزات کا عمل بھی 30 دن میں مکمل کرنا ہے۔ فیصلہ دینے کے لیے بھی ایک مقررہ وقت ہے۔ مقدمے کی سماعت مکمل ہونے کے بعد عدالت کو 30 دن میں فیصلہ سنانا ہوگا۔

رحم کی درخواست کے لیے بھی وقت مقرر

تحریری وجوہات درج کرنے پر فیصلے کی مدت 45 دن تک ہوسکتی ہے لیکن اس سے زیادہ نہیں۔ نئے قانون میں رحم کی درخواست کے لیے بھی ایک وقت مقرر ہے۔ سپریم کورٹ کی جانب سے اپیل مسترد ہونے کے 30 دن کے اندر رحم کی درخواست دائر کرنی ہوگی۔

نئے قانون کی خصوصیات

-پہلی بار دہشت گردی کی تشریح کی گئی۔

-غداری کے بجائے وطن سے غداری جرم بن گیا۔

– موب لنچنگ سیل میں عمر قید یا موت کی سزا۔

یہ بھی پڑھیں