معاشی طور پر کمزورمگر ہونہار طلباء کیلئے امید کی کرن بنا ایچ ڈبلیو ایف

نئی دہلی ،21مارچ :۔

تعلیم کامیابی کی ضمانت ہے مگر بسا اوقات کامیابی کی تلاش میں سر گرم طالب علم کے لئے اقتصادی اور معاشی پریشانی رکاوٹ بن کر کھڑی ہو جاتی ہے ۔ہیومن ویلفیئر فاؤنڈیشن نے ایسے ہی مجبور طلباء کے لئے امید کا ایک چراغ روشن کیا ہے اور ایسے ہونہار طلباء کو اسکالر شپ کے ذریعہ امداد دینے کا سلسلہ شروع کیا ہے ۔ تاکہ ہونہار اور قابل طلباء کی کامیابی کی راہ میں معیشت رکاوٹ نہ بن سکے۔

گزشتہ روز  ہیومن ویلفیئر فاؤنڈیشن(ایچ ڈبلیو ایف) نے   انڈیا اسلامک کلچرل سینٹر میں اسکالرشپ کی تقسیم کا پروگرام منعقد کیا، جس میں دہلی کے 150مستحق طلباء کو اسکالرشپ سے نوازا گیا۔پروگرام میں ہیومن ویلفیئر فاؤنڈیشن کے صدر اور ریٹائرڈ آئی اے ایس افسر سراج حسین نے تعلیم کی اہمیت پر زور دیا اور طلباء کی حوصلہ افزائی کی کہ وہ اسے اپنے مقاصد میں ترجیح دیں۔انہوں نے  تعلیم کی  اہمیت پر زور دیتے ہوئے خاص طور پر اخبارات اور  کتابوں کے مطالعہ کی ہدایت دی ۔انہوں نے کہا یہی ذرائع   طالب علموں کو کسی بھی کورس کا انتخاب کرنے میں مدد کر سکتی ہیں۔

انہوں نے بتایا کہ ہیومن ویلفیئر فاؤنڈیشن کا اسکالرشپ پروگرام ان طلباء کے لیے دستیاب ہے جنہوں نے تعلیمی  قابلیت اور قائدانہ صلاحیت کا مظاہرہ کیا ہے۔انہوں نے کہا کہ  میرٹ اور معاشی ضرورت کی بنیاد پر اسکالرشپ دیے جاتے ہیں۔ اس فنڈ میں ٹیوشن فیس، کتابیں اور دیگر متعلقہ اخراجات شامل ہیں۔ تنظیم نے 8200 سے زیادہ یو جی، پی جی اور خصوصی اسکالرشپ اور 4500 وظائف یتیم طلباء میں تقسیم کیے ہیں۔

پروگرام کے مہمان خصوصی جامعہ ہمدرد کے وائس چانسلر پروفیسر (ڈاکٹر) محمد اشعر عالم نے یونیورسٹی کی طرف سے پیش کردہ اعلیٰ تعلیم کے آپشنز پر تبادلہ خیال کیا اور ہیومن ویلفیئر فاؤنڈیشن کی تعلیمی بااختیار سرگرمیوں کے لیے تعاون کی پیشکش کی۔ ایچ ڈبلیو ایف کے فلیگ شپ پروجیکٹ ویژن 2026 کے چیئرمین ٹی عارف علی نے افتتاحی خطاب کیا۔

ڈاکٹر سید فاروق، چیئرمین، ہمالیہ ڈرگ نے ہیومن ویلفیئر فاؤنڈیشن کی سرگرمیوں کو سراہتے ہوئے موجودہ دور میں دستیاب وسائل سے فائدہ اٹھانے پر زور دیا۔ سرسید کو استقامت کی مثال بتاتے ہوئے سینئر صحافی اور سابق ایم پی شاہد صدیقی نے طلباء کو مشورہ دیا کہ وہ تعلیم اور محنت کے ذریعے اپنے خوابوں کو پورا کرنے کی منصوبہ بندی کریں۔

وومن ایجوکیشن اینڈ امپاورمنٹ ٹرسٹ (ٹویٹ) کے صدر اے کے رحمت النساء نے طلباء کی حوصلہ افزائی کی کہ وہ بے خوف ہو کر آگے بڑھیں اور ناکامیوں کا سامنا کرنا سیکھیں۔ موٹیویشنل اسپیکر اور آئی اے ایس کوچ سمیر احمد صدیقی نے بھی ایوارڈ حاصل کرنے والوں کے ساتھ اعلیٰ تعلیم اور کیریئر کے مواقع پر بات چیت کی۔ اس موقع پر معروف آرتھو سرجن ڈاکٹر ایم فاروق، ہیومن ویلفیئر فاؤنڈیشن کے سی ای او پی کے نوفل اور پی آر ڈائریکٹر ڈاکٹر رضوان رفیقی بھی موجود تھے۔

واضح رہے کہ ہیومن ویلفیئر فاؤنڈیشن کے اسکالرشپ پروگرام نے بہت سے طلباء کو تعلیم اور کیریئر میں نئی ​​بلندیوں کو حاصل کرنے میں مدد کی ہے، اور تنظیم تعلیم کے ذریعے پسماندہ طلباء کو بااختیار بنانے کے اپنے مشن کی تکمیل کی جانب گامزن ہے ۔فاؤنڈیشن کا اسکالر شپ پروگرام بھی پسماندہ طلباء کو با اختیار بنانے کے پروگرام کا ایک حصہ ہے ۔