مظلوم فلسطینیوں کی حمایت میں 22 اگست کو دہلی کے جنتر منتر پر مظاہرہ

دعوت ویب ڈیسک

نئی دہلی،20اگست :۔

غزہ میں مظلوم مسلمانوں کی حمایت کیلئے جہاں پوری دنیا میں انصاف پسند طبقہ آواز بلند کر رہا ہے وہیں وطن عزیز میں  بھی انصاف پسند طبقہ مختلف طریقے سے ان کی حمایت اور اسرائیلی مظالم کے خلاف احتجاج اور مظاہرے کر رہا ہے ۔دریں اثنا   ملک کے ممتاز مذہبی، سماجی اور ملی رہنماؤں نے غزہ کے بحران پر تشویش کا اظہار کرتے ہوئے ایک مشترکہ بیان جاری کیا ہے جس میں عوام الناس سے 22 اگست 2025 (جمعہ) کو سہ پہر 3:00 بجے جنتر منتر پر منعقد ہونے والے پرامن مظاہرے میں بڑے پیمانے پر شرکت کی اپیل کی گئی ہے ۔ یہ مظاہرہ فلسطین کے عوام کے ساتھ یکجہتی کے اظہار کے لیے ہوگا، جو مسلسل ظلم، نسل کشی اور انسانی حقوق کی سنگین خلاف ورزیوں کا سامنا کر رہے ہیں۔

ریلیز کے مطابق حالیہ دنوں میں اسرائیلی جارحیت میں مزید شدت آئی ہے جس کے نتیجے میں ہزاروں بے گناہ مرد، خواتین اور بچے شہید ہوچکے ہیں۔ ایسے نازک اور حساس موقع پر ہماری دینی ، انسانی اور ملی ذمہ داری ہے کہ ان مظلوم فلسطینیوں کے حق میں صدائے احتجاج بلند کریں اور عالمی ضمیر کو جھنجھوڑیں۔

اس موقع پر ملی رہنماؤں نے زندگی کے تمام شعبوں سے تعلق رکھنے والے افراد سے اس احتجاج میں شرکت کی پُر زور اپیل کی ہیں، احتجاج میں مختلف مکاتب فکر ، ملی ، سماجی اور انسانی حقوق کے علمبردار افراد اور تنظیمں شریک ہوں گی۔ اس احتجاج میں شرکت سے نہ صرف فلسطینیوں کے ساتھ ہماری یکجہتی کا اظہار ہوگا بلکہ یہ شرکت عالمی برادری کو امن ، انصاف، اتحاد اور بھائی چارے کا ایک مضبوط پیغام بھی دے گی۔

اپیل کنندگان  میں مولانا ارشد مدنی،صدر جمیعت العلماء ہند۔ مولانا خالد سیف اللہ رحمانی،صدر، آل انڈیا مسلم پرسنل لا بورڈ۔ سید سعادت اللہ حسینی،امیر، جماعت اسلامی ہند ۔ مولانا علی اصغر امام مہدی،امیر، مرکزی جمیعت اہل حدیث۔

مولانا حکیم الدین قاسمی،جنرل سیکریٹری، جمیعت العلماء ہند۔ مولانا احمد ولی فیصل رحمانی،امیر شریعت، امارت شریعہ بہار، اڑیسہ، جھارکھنڈ ، مغربی بنگال۔ مفتی مکرم احمد، امام ، شاہی جامع مسجد ، فتحپوری۔ مولانا عبیداللہ خان اعظمی، سابق ممبر پارلیمنٹ(راجیہ سبھا)۔ ملک معتصم خان،نائب امیر، جماعت اسلامی ہند۔ ڈاکٹر محمد منظورعالم،جنرل سیکریٹری آل انڈیا ملی کونسل۔ ڈاکٹر ظفر الاسلام خان،سابق چیئرمین ، دہلی اقلیتی کمیشن۔عبد الحفیظ، صدر، ایس آئی او آف انڈیا۔ مولانا محسن تقوی، معروف شیعہ خطیب و عالم دین۔ پروفیسراختر الواسع، سابق وائس چانسلر وغیرہ کے نام شامل ہیں۔