ربیع الاول کا مہینہ چل رہا ہے اس موقع پر مسلم اکثریتی علاقوں میں عید میلاد لنبی اور مذہبی اسلام پر مبنی پوسٹر اور بینر آویزا ں کئے جاتے ہیں ۔لیکن حالیہ کچھ برسوں میں شدت پسند ہندو تنظیموں کو مسلمانوں کے ذریعہ یہ بینر اور پوسٹر بھی ناقابل برداشت ہو گیا ہے ۔پولیس اور انتظامیہ بھی ان کی شکایت پر فوراً ایکشن لیتی ہے ۔ ایسا ہی ایک معاملہ مدھیہ پردیش کے اندور شہر میں پیش آیا جہاں ایک مسلم اکثریتی کالونی میں ’اسلام زندہ باد‘ تحریر کردہ ایک بینر لگایا گیا تھا جس پر ہندو شدت پسند تنظیموں نے ہنگامہ کر دیا۔رپورٹ کے مطابق جمعہ کو وشو ہندو پریشد کے کارکنوں نے بینر کے خلاف احتجاج کیا اور پولیس سے شکایت کی اور موقع پر پہنچ کر ہنگامہ کیا۔ اس کے بعد پولیس نے بینر ہٹا کر معاملے کی جانچ شروع کردی۔

معلومات کے مطابق جمعہ کی صبح اندور کے جنسی چوراہے پر یہ بینرلگایا گیا تھا۔ اطلاع ملتے ہی ہندو لیڈر تنو شرما تنظیم کے کارکنوں کے ساتھ ملہار گنج تھانے پہنچے اور اے سی پی وویک سنگھ سے ملاقات کی اور اعتراض درج کرایا۔ شرما نے دعویٰ کیا کہ یہ بینرز مذہبی جذبات بھڑکانے اور یک طرفہ پروپیگنڈے کے مقصد سے لگائے گئے ہیں۔ شکایت کے بعد ملہار گنج تھانہ علاقہ کی پولیس ٹیم موقع پر پہنچی اور تنازعہ کو دیکھتے ہوئے فوری طور پر بینرز کو ہٹا دیا گیا۔ پولیس کا کہنا ہے کہ علاقے میں امن برقرار رکھنے کے لیے کارروائی کی گئی ہے اور معاملے کی چھان بین کی جا رہی ہے۔