صحافت کی دنیا کی معروف شخصیت اور خاص طور پر اردو صحافت کی دنیا میں محبت اردو کے طور پر معروف ایناڈو اور راموجی راؤ فلم سٹی کے بانی راموجی راؤ کا آج صبح تلنگانہ کے حیدر آباد میں انتقال ہو گیا۔ مشہور میڈیا شخصیت اور دنیائے تفریح کے معروف نام راموجی راؤ کا حیدر آباد کے اسٹار ہاسپیٹل میں علاج کے دوران انتقال ہوا۔ انھوں نے 87 سال کی عمر میں ہفتہ کی صبح 3.45 بجے آخری سانس لی۔ راموجی راؤ کے انتقال کی خبر پھیلتے ہی دنیائے تفریح اور صحافت میں غم کی لہر دوڑ گئی ۔راموجی راؤ کی آخری رسومات سرکاری اعزاز کے ساتھ اتوار (9 جون) کو صبح نو سے گیارہ بجے ادا کی جائے گی۔

معزز راموجی راؤ راموجی گروپ اور ایناڈو گروپ آف کمپنیز کے چیئرمین تھے۔ راموجی راؤ کو صحافت کی دنیا میں ایک اعلیٰ مقام حاصل ہے۔ راموجی راؤ کو علاقائی زبانوں میں نیوز اور انٹرٹینمنٹ ٹیلی ویژن چینل شروع کرنے والے پہلی شخصیت کے طور پر جانا جاتا ہے۔ راموجی راؤ کو اردو کے خیرخواہوں میں ایک اعلیٰ مقام حاصل ہے۔ راموجی راؤ نے سب سے پہلے اردو کا سٹیلائٹ چینل ای ٹی وی اردو شروع کیا تھا۔ اردو طبقہ راموجی راؤ کو محب اردو مانتا ہے۔