متنازعہ وقف ترمیمی قانون 2025 کے خلاف جلگاؤں میں خواتین کا زبردست مظاہرہ

نئی دہلی ،30 اپریل :۔

انتہائی متنازع وقف ترمیمی قانون کے خلاف ملک بھر میں احتجاج کا سلسلہ جاری ہے،دریں اثنا گزشتہ روز   پیر کو مہاراشٹر کے جلگاؤں میں، خواتین نے وقف ترمیمی ایکٹ کے خلاف ضلع ہیڈکوارٹر پر احتجاج کیا جس میں ہزاروں خواتین مظاہرین نے شرکت کی۔اس مظاہرے کا اہتمام تحفظ اوقاف کمیٹی، جلگاؤں نے آل انڈیا مسلم پرسنل لا بورڈ (اے آئی ایم پی ایل بی) کی کال پر کیا تھا۔

نظم و ضبط اور اتحاد کے شاندار مظاہرے میں، وقف ایکٹ 2025 کی دفعات کے خلاف جلگاؤں میں کلکٹر کے دفتر کے باہر خواتین کے ایک بڑے اور پرامن مظاہرہ کا اہتمام کیا گیا۔اس احتجاجی میٹنگ میں بڑی تعداد میں جمع ہونے والی خواتین مظاہرین نے حکومت سے مطالبہ کیا کہ وہ فوری مداخلت کرے اور وقف ترمیمی ایکٹ کو منسوخ کرے اور وقف املاک کے تحفظ کو یقینی بنائے

خواتین کے اس پرامن احتجاج کا اہتمام کئی کمیونٹی لیڈروں اور خواتین کی تنظیموں نے کیا تھا اور اس میں جلگاؤں اور آس پاس کے علاقوں سے خواتین کی ایک بڑی تعداد نے شرکت کی۔

اس مظاہرے میں روایتی لباس میں ملبوس خواتین نے ہاتھوں میں پلے کارڈ اٹھائے وقف املاک کے تحفظ اور ثقافتی اور مذہبی ورثے کے تحفظ کا مطالبہ کیا۔

نیلوفر ایم اقبال، ڈاکٹر فرح (میڈیکل آفیسر، سول اسپتال جلگاؤں)، عمارہ تسلیم (جنرل سکریٹری، جی آئی او نارتھ مہاراشٹر)، اور گلناز، نازیہ وغیرہ نے اس پروگرام میں مقررین کے طور پر اپنے خیالات کا اظہار کیا۔

آل انڈیا مسلم پرسنل لا بورڈ (اے آئی ایم پی ایل بی) کی کال پر تحفظ اوقاف کمیٹی، جلگاؤں کے زیر اہتمام، تحفظ اوقاف کمیٹی کے فاروق شیخ، مفتی خالد (امام، مسجد قبا)، عارف دیشمکھ (ممبر، جماعت اسلامی، ضلع صدر، ایم پی، جے گاوں) کے تعاون سے یہ احتجاجی مظاہرہ کیا گیا۔

وقف ترمیمی ایکٹ 2025 کی مخالفت

اس احتجاجی میٹنگ میں شامل خواتین مظاہرین نے وقف ایکٹ 2025 کی سخت مخالفت کی اور کہا کہ اس کی نئی دفعات سے وقف املاک پر غیر ضروری حکومتی کنٹرول، کمیونٹی کی شرکت میں کمی اور نوکر شاہی کی مداخلت میں اضافہ کا خطرہ ہے۔انہوں نے خدشہ ظاہر کیا کہ اس قانون میں ترمیم کے نفاذ سے فلاحی اور مذہبی مقاصد کے لیے وقف زمینوں اور اداروں کے غلط استعمال، فروخت یا دیگر بدانتظامی کا باعث بن سکتا ہے۔

ایک خاتون مظاہرین نے کہا، ’’ وقف املاک صرف زمین یا عمارتیں نہیں ہیں، یہ ہمارے آباؤ اجداد کی وراثت اور ہماری شناخت کا حصہ ہیں۔‘‘انہوں نے کہا، ’’ہم کسی ایسے قانون کو لاگو نہیں ہونے دیں گے جو ہمارے حقوق کو کمزور کرتا ہو یا ہماری کمیونٹی کو وقف کے انتظام سے باہر کرتا ہو۔‘‘انتظامیہ کو میمورنڈم پیش کیا گیا۔

مظاہرے کے اختتام پر منتظمین اور احتجاجی خواتین کے ایک وفد نے مقامی سب ڈسٹرکٹ مجسٹریٹ سے ملاقات کی اور صدر کے نام ایک 11 نکاتی میمورنڈم پیش کیا۔ جس میں وقف ایکٹ 2025 کے نفاذ کے عمل کو فوری طور پر روکنے کا مطالبہ کیا گیا۔

میمورنڈم میں وقف بورڈ کے کام کاج میں شفافیت، غیر قانونی تجاوزات سے تحفظ اور فیصلہ سازی کے عمل میں کمیونٹی کی شرکت کو بحال کرنے کا بھی مطالبہ کیا گیا ہے۔

پروگرام کے اختتام پر، احتجاج کرنے والی خواتین کے ایک وفد نے مقامی سب ڈسٹرکٹ مجسٹریٹ سے ملاقات کی اور صدر کے نام ایک 11 نکاتی میمورنڈم پیش کیا۔ نمائندوں نے وقف ایکٹ کی واپسی تک جدوجہد جاری رکھنے کا عزم کیا۔