لہیہ میں پر تشدد احتجاج، بی جے پی کا دفتر نذر آتش ،چار افراد ہلاک، 70 سے زائد زخمی

دعوت ویب ڈیسک

جموں,نئی دہلی، 24 ستمبر :۔

لداخ کو ریاستی درجہ دینے اور آئین کے چھٹے شیڈول کے تحت شامل کرنے کے مطالبے پر بدھ کو لیہہ میں شدید احتجاجی مظاہرے پرتشدد رخ اختیار کر گئے، جس کے دوران کم از کم 4 افراد ہلاک اور 70 سے زائد زخمی ہوگئے۔ لیہہ اپیکس باڈی کے چیئرمین چیئرنگ دورجے نے ہلاکتوں کی تصدیق کرتے ہوئے بتایا کہ مظاہروں کے دوران فائرنگ میں درجنوں افراد زخمی ہوئے اور اب تک چار افراد جان کی بازی ہار چکے ہیں۔ لیہہ اپیکس باڈی  کے یوتھ ونگ کی کال پر شروع ہونے والا احتجاج  اُس وقت شدت اختیار کر گیا جب دو بھوک ہڑتالی کارکنوں کی حالت بگڑنے پر انہیں اسپتال منتقل کیا گیا۔ ماحولیاتی کارکن سونم وانگچک نے منگل کو اپنی ہڑتال ختم کردی تھی، تاہم نوجوانوں کی جانب سے پتھراؤ کے بعد پولیس کارروائی پر کشیدگی بڑھ گئی۔

صورتحال اس وقت مزید خراب ہوگئی جب مشتعل ہجوم نے مقامی بی جے پی کے دفتر کو نذرِ آتش کر دیا اور ایک سیکورٹی گاڑی کو آگ لگا دی۔ پولیس نے ہجوم کو منتشر کرنے کے لیے آنسو گیس کے گولے داغے اور لاٹھی چارج کیا۔ انتظامیہ نے فوری طور پر دفعہ 163 بی این ایس  نافذ کرتے ہوئے احتجاجی اجتماعات پر پابندی عائد کر دی۔افسران کے مطابق حساس علاقوں میں اضافی سیکورٹی فورسز تعینات کر دی گئی ہیں تاکہ مزید بگاڑ روکا جا سکے۔

اسپتالوں میں درجنوں زخمیوں کو منتقل کیا گیا جن میں سے کئی کو انتہائی نگہداشت کی ضرورت ہے۔ہنگاموں کے باعث دو روزہ لداخ فیسٹیول بھی عین اختتام سے قبل منسوخ کر دیا گیا ۔

سونم وانگچک نے اپنے حامیوں سے تحمل و سکون کی اپیل کرتے ہوئے کہا کہ میں نوجوانوں سے درخواست کرتا ہوں کہ آگ زنی اور جھڑپوں سے باز آئیں۔ ہماری بھوک ہڑتال ختم ہو رہی ہے، اور انتظامیہ سے بھی اپیل ہے کہ آنسو گیس کا استعمال نہ کرے۔ اگر انسانی جانیں ضائع ہوں تو کوئی بھوک ہڑتال کامیاب نہیں کہلا سکتی ہے ۔

یاد رہے کہ دفعہ 370 کے خاتمے کے بعد 2019 میں لداخ کو براہِ راست دہلی کے زیرِ انتظام یونین ٹیریٹری بنایا گیا تھا، تاہم مقامی آبادی ریاستی درجہ اور خصوصی آئینی تحفظات کا مطالبہ کرتی رہی ہے تاکہ خطے کے نازک ماحولیاتی توازن، منفرد ثقافتی شناخت اور قبائلی حقوق کو محفوظ بنایا جا سکے۔