لال قلعہ کی فصیل سے آر ایس ایس کی تعریف پر چوطرفہ تنقید

نئی دہلی،16 اگست :۔

جمعہ کو یوم آزادی پر قوم سے خطاب کرتے ہوئے وزیر اعظم نریندر مودی نے اس بار 103 منٹ کے اپنے طویل خطاب میں جہاں اپنی حکومت کی کامیابیوں کو شمار کرایا وہیں اپنی مادری تنطیم راشٹریہ سویم سیوک سنگھ کی بھی تعریف کی ۔ مودی نے ہندوتوا تنظیم آر ایس ایس کی اس کے 100 سالہ سفر پر تعریف کی اور اسے "دنیا کی سب سے بڑی این جی او اور ملک کی فلاح و بہبود کے لیے وقف ایک تنظیم قرار دیا۔

مودی نے کہا، کہ سو سال پہلے، راشٹریہ سویم سیوک سنگھ (آر ایس ایس) کا قیام عمل میں آیا تھا جس نے خود کو قوم کی فلاح و بہبود کے لیے وقف کر دیا تھا۔ خدمت، لگن اور نظم و ضبط کے ذریعے، اس تنظیم نے قوم کی تعمیر میں کلیدی کردار ادا کیا  ۔ یہ دنیا کی سب سے بڑی این جی او ہے جس کی 100 سال کی لگن کی تاریخ ہے۔”

وزیر اعظم مودی کے ذریعہ لال قلعہ کی فصیل سے آر ایس ایس کی تعریف نے چوطرفہ تنقید کی وجہ بن گئی ہے ۔کانگریس رہنما جے رام رمیش نے  مذمت کرتے ہوئے کہا کہ، "یہ ایک آئینی، سیکولر جمہوریہ کی روح کی کھلی خلاف ورزی ہے۔  انہوں نے الزام لگایا، "2024 کے جون کے واقعات کے نتیجے میں نمایاں طور پر کمزور ہوئے وزیر اعظم اب مکمل طور پر موہن بھاگوت کے احسانات پر منحصر ہیں کہ وہ ستمبر کے بعد اپنی مدت ملازمت میں توسیع  کی خواہش رکھتے ہیں۔”

سی پی آئی (ایم) نے بھی مودی کی تقریر کو مسترد کیا اور کہا، "ان کی تقریر شہداء کی توہین ہے، ایک فرقہ وارانہ،   کالعدم تنظیم کو آگے بڑھانے کے لیے ایک تاریخی واقعہ کو داغدار کرنا ہے۔ یہ شرمناک اور ناقابل قبول ہے۔

اے آئی ایم آئی ایم کے سربراہ اسد الدین اویسی نے بھی پی ایم کو تنقید کا نشانہ بنایا اور کہا، "یہ آزادی کی جدوجہد کی توہین ہے۔ وہ آر ایس ایس اور اس کے نظریاتی اتحادیوں کی تعریف کر رہے ہیں جنہوں نے  انگریزوں کی  خدمات انجام دیں اور گاندھی سے اس سے زیادہ نفرت کی جس سے انہوں نے انگریزوں کی مخالفت کی تھی۔

دریں اثناء کئی دوسرے سیاست دانوں اور کارکنوں نے بھی ہندوستان کی آزادی میں تنظیم کے کوئی کردار نہ ہونے کی بات کہی اور الزام لگایا کہ یہ تنظیم سول نافرمانی کی تحریک، ہندوستان چھوڑو تحریک اور برطانوی حکمرانی کے خلاف ہونے والے دیگر مظاہروں سے دور رہی۔

آر ایس ایس جو کہ بی جے پی کی بنیادی تنظیم ہے، نے آزادی کی جدوجہد میں حصہ لینے سے انکار کیا، آئین اور قومی پرچم کی مخالفت کی اور 50 سال سے زیادہ عرصے تک ترنگا نہیں لگایا۔

انہوں نے یوم آزادی کے موقع پر ایک ایسی تنظیم کی تعریف کرنے پرمودی کی سخت مذمت کی جس کی سرگرمیوں پر پابندی لگا دی گئی تھی اور اسے "ملک دشمن” قرار دیا گیا تھا۔